張燊悅是家中獨女，母親管教甚嚴，不時將她藤條炆豬肉，但慈父痛心女兒，竟搶走藤條扮打地氈，齊齊扯貓尾呃媽咪，不過張燊悅長大後就知媽咪用心良苦，故她以優良的讀書成績報答雙親。
張燊悅是上海人，父母只有她這粒掌上明珠，故她自小就萬千寵愛集一身，不過她的家教很嚴，媽媽是標準嚴母，爸爸是超級慈父，小時候常被媽咪打罵。
張燊悅日前在電話中說：「細個時媽咪會用藤條打，太近睇電視要打，唔着拖鞋要打，個櫃桶有糖紙又打，唯一係我讀書成績好唔使打。細個我好恨做大人，因為家規唔准駁嘴，有乜事我都要『骨』一聲吞咗佢。」
張爸爸不忍心愛女被打，兩父女居然扯貓尾來瞞天過海，張燊悅說：「我記得有次俾阿媽打，爹哋即刻話『等我嚟』，其實佢只係打落地氈度，我哋做晒戲，媽咪就走去煮飯。爹哋一向超錫我，同我玩，畀糖我食，行街經過玩具舖，又帶我入去睇。媽咪就掉番轉，但我冇嬲過佢，大個就覺得媽咪好正，因為佢會帶我行街買衫。」
張燊悅從小就很活躍，跳芭蕾舞、合唱團、吹笛和彈琴，念中、小學時常與印、巴的同學仔為伍，後來就跑去加拿大讀大學，回港後再入港大修法律，讀書過程相當順利，但唯一毛病，就是說話太多了。她笑說：「我冇兄弟姊妹，成日都想識朋友，細個時咪猛撩同學仔講嘢囉，所以每次見家長，老師都咁同我爹哋媽咪講：『可唔可以叫你個女講少啲嘢呀？』」
採訪：朱芷瑩
