早前呼籲市民「記得記得記得， 洗手洗手洗手」而成為一時佳話的特首夫人董趙洪娉，前晚在《香港再起飛》活動上又惹是非。表演嘉賓汪明荃人有三急欲往就近洗手間方便時，獲悉該洗手間臨時封閉五小時供董太專用，令身為全國政協委員的阿姐激氣地說：「佢啲下屬咁唔識做，唔怪得之搞到佢形象咁差啦！」
前晚赤鱲角機場離境大堂舉行的《心連心．香港再起飛》，據悉開騷之前，有份擔任表演嘉賓的汪明荃忽然人有三急，欲乘搭升降機下樓前往最接近舞台的洗手間時，卻被看守升降機的機場保安人員告知該位於抵港大堂的洗手間，為在場的「心連心．全城抗炎大行動」名譽顧問、特首夫人董趙洪娉專用，着阿姐前往離舞台較遠的離境大堂洗手間。由於當時阿姐已急得如熱鍋上的螞蟻，而保安人員竟要求她走遠路方便，登時令阿姐無明火起三千丈，對有關安排極度不滿。
記者昨日致電向阿姐求證時，阿姐承認說：「係呀！噚晚六點幾我想去洗手間，最近就係搭𨋢落去嗰個，點知啲人話下邊個洗手間封咗，要留番畀董太用喎！咁又係，我哋冇特權吖嘛！佢（董太）啲手下咁唔識做，唔怪之得搞到佢形象咁差。」
而前晚有份表演的陳潔靈，原來亦知道阿姐為董太「佔用」洗手間一事而氣憤不已，陳潔靈昨日在電話中說：「阿姐係好嬲，但後尾我同佢一齊去食麵，順番佢條氣啦！對於封洗手間呢件事我就不予置評，呢樣嘢啱同唔啱真係見仁見智，但在我個人嚟講，其實行多十幾步都冇乜問題啫，呢個係保安問題吖嘛！可能阿姐係全國政協委員，所以特別㷫啲啦！」
阿姐欲使用董太專用洗手間被拒諸門外，但身為前晚大會司儀之一的肥媽瑪利亞，雖然亦一度被禁止入內，但經肥媽極力爭取後，仍可入內方便。
肥媽昨日在電話中說：「唔畀阿姐去咩？我唔知喎，我都係去嗰個洗手間㗎喎！不過我去嘅時候，着紅色衫啲人都同我講，話：『唔好意思，下邊個洗手間係畀嘉賓專用。』我聽到之後就同佢講：『唔好意思阿哥哥仔，我都係嘉賓嚟㗎。』對方於是笑一笑話：『係嘅係嘅！』然後咪畀我入去囉！我個工人重同我一齊入去㖭！」
肥媽表示若要她走到離境大堂的洗手間，路程實在太遠，對工作人員極不方便，肥媽說：「如果着紅衫啲人同我講，話個洗手間淨係畀董太用，邊個聽到都會㷫啦，不過，我諗可能係一場誤會啦。」
對於封廁的安排，機管局方面昨日則承認該抵港大堂的洗手間的確是被封閉，但並非為董太一人而封，機管局發言人廖小姐昨回覆說：「我哋只係封咗一個細嘅洗手間啫！咁做係為咗方便一啲參加活動嘅嘉賓使用，唔會話唔畀藝人去，我諗可能係溝通上嘅誤會啫！其實喺舞台附近有其他洗手間，嗰度地方重大啲方便啲啦。」
採訪：戴彩煥
攝影：仇志德、陳慧安、汪正文
