美股杜指上周五一度升到9200水平，但尾市回軟，收市升幅收窄至21點，美股短期或會出現調整。杜指上周五收9062，已係收市升破前浪頂9043，短期在此水平整固後再上，則確認美股熊市已去，牛市重來。納指則一早已升破前浪頂1521，上周五出現高開低收，收市倒跌18點，報1627，料屬急升後的正常調整，牛市早已開始。
上周末，又係同一眾芬佬「打牙骱」時間，歸納佢哋嘅意見，9成認為美股熊市已過去，今年3月12日嘅低位，杜指7416同納指1253，已可確認係熊市嘅底，歐洲幾大股市同日本股市亦一樣，相信熊市底部經已出現。
本來全球股市嘅熊蹤已杳，港股亦唔會例外，但芬佬就對港股後市仍有一點保留，雖然恒指已升破250日線牛熊分界線，近日成交亦顯著增加，但佢哋要睇多一段時間，就係大市升後調整，能否再重上250日線；又或大市再升，拋離250日線，例如上到10000水平，但調整時能否守穩250日線。
上述兩個情況，只要能重上250日線，又或能守穩該線再上，則港股才可確認熊市到底，恒指在年底有機會升上11000至11500。
講到個別股票，佢哋話有幾隻中細價實力股可以留意，就係震雄集團（057）、浙江玻璃（739）、權智（601）同中意控股（1198），基金已經收集咗好耐，日後必會有表現。
震雄由今年3月低位1.8元起步，升到上周五的2.625元，升幅45.8%，係期間工業股升幅較為顯著者，沿途走勢反覆向上，形成上升通道，係典型的收集格局，基金對此股情有獨鍾，股價「坐三望四」應有好大機會。
震雄主要生產塑膠注塑機同有關設備，中國及香港兩地為最大市場，由於內地經濟持續高增長，對注塑機需求上升，集團已加快發展步伐，今年內斥資2億元，擴大內地產能1倍，並加強拓展華東市場，預期會成為未來數年業務增長的動力。
03年度（3月年結）的上半年，震雄盈利已上升60%至8061萬元，每股盈利13.2仙，估計全年可上升至28仙，以工業股保守PE12倍計，震雄股價已可升上3.4元水平。
郭兆誠