又有玩具減價喇！不過今次大人只有份畀錢無份玩，因為勁減嘅玩具只係啱剛出世嘅BB同埋三、四歲嘅細路玩，而且大部份係名牌迪士尼出品，超可愛嘅米奇BB同小熊維尼全部到齊，唔少都係益智玩具；帶小朋友嚟到呢個減價場，肯定佢哋開心到唔捨得走！
記者：馬慶武 攝影：梁細權
Model：阿文、陳曉彤
逢星期一至三刊出
親親小寶港九新界都有門市，一向主打賣迪士尼玩具，保證全部正版貨。今次佢哋就推咗一啲較多存貨嘅迪士尼玩具出嚟搞減價，大部份都減到接近半價，而且希望趁住就快暑假，刺激啲父母消費，買啲玩具畀小朋友玩。除咗今次西環嘅減價Show外，遲啲不同門市都會輪流減價，今次無時間去嘅就要打電話問詳情喇。
呢兩隻超級可愛嘅米奇美妮BB公仔，除咗識播音樂之外，重識喺地上爬，莫講話𠱁小朋友，買嚟𠱁女仔都一樣得。
原價每隻$249.9
特價每隻$125
變身成為童話中嘅主角肯定係小朋友嘅夢想，咁呢啲童話主角嘅服裝就幫到手喇，分別有白雪公主、小仙子同小女巫等角色，四十蚊一套就可以幫小朋友大變身。
原價每盒$199.9
特價每盒$40
最啱剛學識行嘅BB仔，可以畀佢扶住嚟行之餘，車上重有齊各樣小熊維尼BB玩意，玩完又可以放番入車內，整整齊齊。
原價$499.9
特價$249.9
除咗有更多串字遊戲玩外，顯示器重可以獨立拆出嚟當係普通遊戲機咁玩，一機兩用而且減得更平，更加抵買。
原價$399.9
特價$199.9
專為出世無耐嘅BB仔而設，可以放喺BB床上，咁BB仔瞓喺度都可以伸手玩架上嘅玩具，又唔怕啲玩具跌落嚟，夠晒安全。
原價$499.9
特價$249.9
非常益智嘅玩具電腦，按不同字母就會發出不同字母嘅讀音，重可以同小朋友玩串字遊戲，可以趁小朋友未入讀幼稚園前幫佢打好基礎。
原價$329.9
特價$229.9
原價$99.9
特價$99.9買一送一
呢幾款小熊維尼嘅玩具，有買一送一優惠，而且不限款式，即係買其中一樣就可以揀多樣其他款式，變相即係減到半價，小朋友最着數，又多件玩具玩。
對象年齡較細，只要按下頭頂嘅按鈕，裏面嘅機關就會轉動，重會發出啷啷聲，好奇嘅BB一定鍾意玩。
扮晒CD機。雖然佢用嘅唔係CD，不過一樣可以換碟，每隻碟內有四首不同歌曲。部機唔使用耳筒聽，因為本身已設有擴音器可以播音樂。
畀一歲或以上嘅BB學認不同圖案嘅玩具，其中一面重有時針同分針，可以教埋佢認識時間。
仿古式嘅音樂盒，只要絞動盒側手柄，就會發出動聽嘅音樂，不過躲藏喺裏面嘅小丑小熊維尼亦會同時彈出嚟嚇你一驚，小心唔好嚇親小朋友呀。
只要於減價期內買滿港幣一百蚊，可獲贈一個小熊維尼鎖匙扣。
西環卑路乍街8號西寶城上層地下大堂
減價日期及時間：2003年6月9日至15日上午11時至下午9時
電話：26113611