小初向來對創業板股印象麻麻，但周不時都有經紀朋友推介，搞到小初覺得盛情難卻，如果唔幫襯佢哋買番多少，好似唔多畀面。
上周五，靚女經紀向小初推介元征科技（8196），佢話公司在大陸嘅汽車維修保養業務搞得唔錯，業績見得人，加上有幕後人維持秩序，上市以來股價有升冇跌。據聞近排話想搞配股集資，股價會有表現，叫小初留意。
小初睇過資料，原來隻股去年10月以每股0.72元招股上市，家陣上市接近8個月，股價真係未停過咁升，最高見過1.51元，上周五收1.45元。不過，通常係私人派對先至有咁嘅走勢，所以就算上車，都係睇勢短炒一轉，見好就收。
另外，繼上海首富被查之後，上星期提過有古仔跟尾嘅新萬泰（433），果然亦停牌，兼夾證實公司主席原來與上海首富一齊被查。睇嚟上海幫在本地股市風光嘅日子，將告一段落。
慕容小初