港股上周5日共升207點，升幅唔算大。上周五期指高水63點，亦意味後市睇好。短期反覆一陣，有機會上試今年1月高位9892。
吼機會買恒指Call輪，呢類輪全市最多，有27件，短炒搵對象，最好向啲大成交、低溢價、槓桿率有番咁上下嘅埋手，例如9663、9711同9749。其中9663溢價得1.7%，槓桿率又去到38倍咁爆炸，數據好靚，理由係快趣到期，月底前夠鐘，要有心理準備，隻輪波動得好勁。
9749壽命稍長，可以賭到8月杪，而槓桿率又好勁，去到成39倍，所以買呢隻要畀高啲溢價，即5.8%。
恒地（012）逐級爬升，等反覆靠軟嗰陣，執啲恒地Call輪玩吓，對象係9787，明年2月到期，現價32仙，溢價5.4%，槓桿率7.1倍。另外隻9648，雖然輪價只得2仙，但行使價28.88元，雖然有4個月命仔，最後都係冇得剩居多，唔使諗佢。
滙豐（005）繼續向上移，有可能帶動個仔恒生（011）。中銀（2388）近排有啲負面新聞，可能有人沽出中銀，將啲錢買番同類股，最近磅嘅同類股又係恒生。買啲恒生Call輪應該有啲着數，只可惜冇乜對象可以揀。有隻9654，下月底到期，現價9.5仙，溢價5.5%，槓桿率87.6倍，贏面唔係好大，但都博得吓。預咗輸晒，但若然正股升幅超過5.5%，之後每升1元，就相等於現時輪價嘅105%，正式刀仔鋸大樹。
章盛