和黃用震撼價推出青衣藍澄灣首批單位，但就冇講實幾時可以揀樓，好多人都唔知佢哋究竟想點？蘭西對呢個情景有啲熟悉。回心想，好似舊年尾，長實、新世界同市建局，推出上環帝后華庭嗰陣，一早就公布首批定價，但就遲遲都未講揀樓日期，等到其餘單位差唔多賣晒，先公開發售。
和黃睇怕都係想用番呢條橋，過去幾日起勢谷內購，重出動埋「派貨」嘅形式賣樓，現場氣氛不知幾熱鬧，經紀同啲客不時起哄，冇乜邊個理公開發售呢一回事。
噚日到場買家更多，每張售樓枱前面，四大代理分別盤踞有利位置，一有買家揚出本票、身份證等有關文件，代理就埋枱問價，價錢一出，四行就鬥快「搶貨」，手快有手慢冇，大家都爭住要。代理重急過啲買家，成日催促買家，心水單位俾人哋攞咗，就游說買第二個，氣氛充滿壓迫感，啲客又照單全收，個市咁多現樓新貨揀，都重要咁辛苦買樓花。費解！
曾幾何時，地產經紀搵錢話咁易，但樓市一冧幾年，搞到唔少經紀冇啖好食。不過，行行出狀元，有啲人淡市一樣搵到錢，好似中原新人王德康，上個月先攞到牌，今個月初一個禮拜，就促成四單薄扶林貝沙灣成交，為公司賺取超過五十萬佣金收入，秘訣離唔開勤力撈客，喺售樓處一企就十多個鐘，日日如是。一再證明，只要有毅力兼且有運氣，做邊行都有機會出位。
樓市氣氛好番啲，四大代理都急不及待搞報捷活動，激勵員工士氣，美聯話港島區5月佣金收入比起4月多40%。至於兄弟公司港置，5月營業額增長有一倍㖭。
中原都有喜訊，奪得由香港管理專業協會主辦，第35屆傑出推銷員獎，由荃灣區兄弟班丘漢偉及丘漢雲分別奪得兩個組別嘅獎項。利嘉閣5月份表現也突出，有成八間分行，打入中原集團嘅首十五位，沙田大圍豪宅及沙田第一城，重成為「百萬雄師」㖭。
早排蘭西同住喺西鐵站隔籬屋苑嘅屯門友閒聊，佢話雖然西鐵就快通車，但未必會搭。佢哋解釋，出入最緊要係點到點，搭特快線巴士一程車去得到嘅地方，搭西鐵就要轉幾次車先到。政府起條鐵路去到門口都吸引唔到人搭，真係好難想像一啲新盤，離鐵路車站要十分八分鐘車程，就話係鐵路沿線物業，究竟呢個吸引力係咪咁大呢？
樓市大不如前，要引起買家嘅興趣，發展商採用軟銷賣樓策略，愈來愈普遍。上個禮拜蘭西同華人置業董事助理凌緣庭傾開，佢認為，如果賣嘅樓盤涉及過千伙，屬大型項目，需要將物業概念逐步滲透入社區，唔急得，難免要用軟銷手法。今年下半年華置都有唔少樓盤會賣，較大型係同新世界、信和、九倉等合作發展嘅何文田君頤峰，有七百個單位，宣傳攻勢好快展開。
除咗住宅物業，凌緣庭話，旗下商場將會喺暑假搞活動，以迎合年輕人為主，提供優惠，期望繼續刺激購買意欲，增加商場人流量。
蘭西
電郵地址：
