本來預定四月有大搞作嘅WeWa!MP3機，因為沙士令活動焗住延期，到上星期六終於嚟料，除一口氣推出四款各有特色嘅MP3機，重正式宣布近排勁紅嘅Shine任新代言人，就算去到馬鞍山咁遠，照樣都有過百Fans捧場，令到呢幾部WeWa!MP3機仔聲勢大增。
記者、攝影：徐影龍
今次一共有四款新型號MP3機，每部都各有特色，問到Shine肯定好官方咁話四部都咁鍾意，不過筆者咬住唔放，係都要每人揀一部至鍾意嘅型號，間接睇吓兩位陽光大男孩嘅品味取向。
天佑揀咗WMP-130，驟眼睇呢部長條形MP3機冇乜特別，都係夠靚夠細部。天佑鬼馬一笑，原來內有乾坤，一㩒掣部機會啪一聲彈個USB插頭出嚟，作直插電腦抄歌之用，十足十一把彈弓刀咁，抵死度攞滿分。從此可觀察天佑鍾意靚嘢之外，重要有啲鬼馬同過癮。
講番部WMP-130，內置128MB記憶體及支援MP3、WMA兩種音樂格式，屬基本大路料，不過咁細部機，有齊中、英文發光屏幕及8小時錄音功能，都算幾犀利。值得一提係唯一一款採用內置式充電池嘅型號，補充上較為麻煩。
留長髮嘅又南揀嘅時候，先諗咗一陣，終於揀咗部鵝蛋形嘅WMP-200+。呢部機以一體式設計，外形十足十一隻鵝蛋咁圓滑得意，兼且機仔細細都有發光屏幕，睇埋中、日、韓同英文都冇問題。雖然WMP-200+不設外加擴充記憶體，不過已內置128MB，已可收錄32首MP3或WMA音樂（以4MB一首計），足夠一日返工搭車時聽歌之用。最正係設有自定嘅均衡器（EQ），要咩環境聲效自己話晒事。
睇番WMP-200+嘅設計，得出結論係又南喜愛Cutie得嚟又夠的骰嘅外形。咦，有冇Fans符合條件呢？
數到最輕巧細部，要算係呢款號稱全球最細嘅UM9Y-101，齋睇機身體積只有64×24×12mm，約莫只等於半個打火機咁大，真係散紙包都放得落，而且內置128MB記憶體之餘，重有9小時現場錄音功能，更可播放MP3及WMA格式，的確幾厲害。機仔細細有咁多Funtion，其實係將電池及部份功能移到線控耳筒之內，好巧妙咁分散咗注意力。細小機身可當埋USB記憶手指咁抄寫資料，賣價都係六百蚊有找，預計暑假必熱之作。
剛介紹嘅三款機都只係內置128MB記憶體，呢部WMP-340+就勁得多，內置有512MB記憶體，屬全球最大容量MP3機，足足可收錄128首MP3音樂，就算渡過一個悠長假期都夠聽有突，慳番唔少另買記憶卡嘅錢。WMP-340+採用分體式設計，掹走電池盒亦可作記憶手指咁用，咁大容量基本上都好難用得晒。設有藍光屏幕及支援中英文顯示，賣價$1,980，若嫌貴可選擇另一款256MB型號，功能一樣不過賣價只係$1,380。
恒昌電子查詢：21111488