喺酒樓、菜館叫的菜式，睇落好似難以炮製，咁你就錯啦！原來只要動動腦筋，一樣可以自己喺屋企煮，重可以轉用自己喜愛的材料，唔信等讀者Kathy為大家示範，將最喜愛的雲腿扒津白、玫瑰蝦、粟米魚肚羹變成家中小菜。
文：Wind 攝影：林栢均 示範：Kathy（太子讀者）
逢星期一至三、五刊出
外表斯斯文文的Kathy，煮餸技巧之所以咁到家，原來係細細個不斷鍛煉的成果。本身是水上人的Kathy，小時候因爸媽出外工作，小學四年級開始，就要兼任家中大廚一職，從而鍛煉出一手好廚技。
識得煮菜出街食飯當然選吃最好的菜餚，不過佢就話好吃還好吃，份量少食完後總是覺得到喉唔到肺，但價錢重太貴唔敢叫太多，有部份配搭又未必合胃口，所以決定將至愛的街外小菜變成家中小菜。
好味易煮的菜式又點可以唔益吓讀者，Kathy選擇了雲腿扒津白、玫瑰蝦、粟米魚肚羹，將之搖身一變變成經濟抵食的雲腿娃娃菜、鮮味十足的玫瑰花蟹及材料十足的冬菇魚肚羹。這幾味小菜最受Kathy親朋戚友歡迎，令人人食指大動。
自煮價$50（二至四人）
Kathy的媽媽最鍾意飲魚肚羹，但通常酒樓就只有粟米魚肚羹，為咗轉轉口味，Kathy以冬菇、瘦肉、蝦米代替粟米，不知幾受家人歡迎；每次Kathy在家請客都必定有這個羹，亦係佢朋友的至愛。
冬菇10隻、炸魚肚2両、瘦肉2両、蝦米少許、薑2片
1.冬菇、魚肚、蝦米洗淨浸軟；將魚肚、冬菇瘦肉切粒待用。
2.燒紅鑊後加入少許生油，加入薑片爆香，再將所有材料加入炒香。
3.再加入４至６碗清水，水滾後放鹽、葱花翻滾即可。
自煮價$45（二至四人）
可能因為係水上人，所以Kathy好鍾意食海鮮，有次同朋友試咗味玫瑰蝦，味道一流，但只用蝦來煮又好似冇乜新意，所以搵鮮味同樣十足的花蟹代替，味道當然係一流啦！連讀緊小學的姨甥女都食到唔停得口。Kathy醒大家烹煮前謹記將蟹嘴除去，除了因積有太多污穢外，蟹嘴偏寒，多食對身體唔係太好。
花蟹2?隻、薑2片、葱花少許、蒜頭2粒（切片）、玫瑰露酒適量
1.將蟹洗淨、除去內臟，切件備用。
2.燒紅鑊並加兩茶匙生油，油滾先放入薑片、蒜頭片爆香，加入花蟹炒一炒，蓋上鑊蓋。
3.煮至花蟹收水，加入少許鹽及適量玫瑰露酒，再加蓋煮至蟹件轉紅，最後加入葱花再焗一分鐘即可。
自煮價$10（二至四人）
Kathy話街外要叫一碟雲腿扒津白起碼要四、五十蚊，份量少之餘，太大棵的津白老人家及小朋友未必啱食，所以動吓腦筋用又腍又甜的娃娃菜代替，美味程度不變之餘，價錢又平重可以自己控制味精份量，Kathy同姨甥女就最鍾意食。
娃娃菜2棵、雲腿數片
1.娃娃菜洗乾淨後切成四份，雲腿洗淨切絲備用。
2.雲腿切片平均地放在菜面上，撒少許鹽。
3.水滾後將菜式放入蒸15至20分鐘。
4.蒸好後將碟內水份倒出，倒進熱鑊加少許鹽及豆粉埋芡即可。