肥師奶變索女好煞食
馮仁昭四圍超：甄妮周身肉值200萬

自從張玉珊嘅修身堂搵咗已為人母嘅恬妞做減肥代言人之後，恬妞由肥婆變咗身材好弗嘅女人，搞到班肥師奶頓時覺得人生充滿希望，個個要去減肥。

代言人傾巢而出
而其他纖體公司就梗係唔執輸，開始搵啲肥師奶人辦，好似薛家燕、杜麗莎同陳秀雯等做減肥代言人，而瑪花繼搵李美鳳同林嘉欣做代言人後，最近就成功游說甄妮減肥。
聽講啲肥師奶都幾捨得使錢減肥，所以今次甄妮做纖體代言人，酬勞當然好可觀，有傳瑪花畀成二百萬酬金佢，馮仁昭都問過纖體公司嘅代表，酬金幾多同幾時同甄妮開記者會，不過佢哋就話唔想講住。

黃大煒新碟任踩唔嬲
台灣歌手黃大煒噚日推出新專輯，佢入面有隻歌《甲午戰爭三部曲》，全首歌有二十分鐘咁長。黃大煒出道十五年，之前發行過六張專輯，喺台灣都幾受歡迎，但係台灣名主持人陶子就批評佢呢張專輯一聽就知唔會大賣，不過黃大煒唔單止唔嬲，重話陶子最懂得佢嘅音樂。

余安安助手惡過主人婆
余安安同李萬祺離婚後，宣布全面恢復幕前工作，賺錢養兩個女。佢噚日就同一個形象指導同一個助手喺金鐘太古廣場出現，記者想同佢影張相時，佢嘅助手已經第一時間擋駕，重幾惡咁話：「有乜好影呀？」而余安安就一直保持笑容。

楊恭如急急腳晚膳
上海首富周正毅因問題貸款而被扣查一事，全城關注，而一度跟周正毅傳過緋聞嘅楊恭如，亦因為咁成為傳媒追訪對象。噚日下晝楊恭如揸車離開裕景花園寓所，去咗佢老友林建明屋企食晚飯，因為現場有成班記者喺度，所以佢一落車就急急腳走人，半句話都唔想講。

梁雪湄狂搵食脹爆
梁雪湄同Kawaii噚日喺黃大仙中心出席商場騷，梁雪湄話：「我近排幫無綫主持一個介紹去邊度食嘢嘅節目，食咗好多美食，都肥咗少少，好彩呢幾日都瘦番啲。」另外，Kawaii有癡心女fans到場支持，重送咗一隻手表畀佢做禮物，個女fans話唔鍾意Kawaii個緋聞男友陳宇琛。