機場富豪酒店噚日搞咗個「經濟再高飛」商界研討會，城中猛人齊集，八方忽然見到富豪酒店主席羅旭瑞，佢戴住副黑超，着住件黃色風褸，唔似嚟參加研討會。原來羅家大少係嚟巡場。沙士搞到酒店生意鬼咁難做，所以近排好低調嘅羅主席都要親自監場，以免待慢貴客。
講到生意難做，太古主席何禮泰最有切膚之痛，因為沙士搞到國泰同太古廣場都冇晒客，近排先熱鬧少少。噚日渣打銀行董事王冬勝演講時話，世衞解除香港旅遊警告嗰日，佢同渣打成班同事去咗銅鑼灣時代廣場慶祝兼購物，到何禮泰發言時即刻話：「彼得（王之洋名）下次要慶祝同購物，記得嚟太古廣場。」好彩九倉主席吳光正唔喺度，否則隨時變成公開搶客大戰。
（圖）羅旭瑞戴晒黑超「出巡」，富豪夥計要醒定啲喇。
傳真︰2623-9278
電郵︰