劉德華早前已簽約接拍張藝謀新片，最近拍罷《22世紀殺人網絡》的袁和平，欲返港開拍一部古裝武俠片，亦找華仔與鄭秀文擔任主角。對於愈來愈多國際級導演邀請拍戲，晉身國際級演員有望，華仔表示：「我都想入國際市場。」
袁和平自從在美國擔任了一連三部《22世紀殺人網絡》及《臥虎藏龍》動作指導後，其才華深受美國電影人讚賞，當地亦有資金支持他開戲做導演，但袁和平卻無意開拍西片。
等劇本之時內地選景
最近袁和平回港後，正籌拍一部古裝武俠片，男主角想找劉德華，女主角則屬意鄭秀文（Sammi）。兩位《孤男寡女》和《瘦身男女》拍檔，將有機會第三度合作。
因該片大部份外景會在內地拍攝，故袁和平日前已返了內地選景，據悉他希望拍一部比《臥》片和《英雄》更有個人武俠風格的影片，待劇本修改好之後，袁和平才會正式找Sammi和華仔洽談演出事宜。
去荷李活唔一定瞓身
昨日記者向華仔求證，他說：「呢件事我有聽過，但就未有人真正聯絡我，所以我都唔知係唔係，等我有機會咪搵八爺（袁和平）傾吓囉，睇吓有冇新嘢畀大家睇，究竟佢想搵我同Sammi拍乜。我同Sammi拍袁和平，加埋佢對動作片又有新意念嘅話，都係賣點嚟㗎。」對於《22世紀殺人網絡》，華仔表示他看過第一集，未看第二集。對於第一集的評價，華仔只說了簡單一個字：「好！」
華仔明年除了拍張藝謀影片外，又可能有機會與袁和平合作，對邁向國際影壇又跨進一步，但他強調自己接戲從來沒有定下入荷李活作為目標。華仔謂：「拍到張藝謀咪係我目標囉，我只係想同佢合作。我都想入國際市場，但唔會刻意，最好順其自然，入到咪入囉，我揀戲都唔係以呢個做方向。」
港片學外國技術新鮮
華仔表示打入國際市場不一定要將所有時間放在外國拍戲，他說：「要去荷李活，要先準備好演技，演員喺任何地方都一樣，你要先清楚人哋要乜，𠵱家荷李活要動作劇情片，如果我拍部談情文藝片，係咪去到？唔通要我只拍一種戲咩？所以冇必要全職喺嗰度，好似梁朝偉咁，佢一路喺香港又係咁，喺香港重有好多空間可以試好多嘢。」
華仔謂即使他接拍荷李活片，也不是刻意進入別人的市場，他說：「係當去學多一樣嘢，好似《22世紀殺人網絡》咁，香港拍唔拍到呀？咁大家咪去研究囉。八爺拍完外國嘅動作片，都會帶啲新嘢返嚟，嗰啲嘢擺喺香港做，香港又做到嘅話，賣點咪會好囉。」
採訪：陳月媚、蔡如玉
攝影：仇志德、何國豪
