佘詩曼與郭羨妮的是是非非倒真具戲劇性，兩位花旦拍《帝女花》之初傳爭寵不和，該劇拍竣後，二人忽然老友鬼鬼，但有傳她們其實扮friend，口和心不和。
阿佘覺得是非多多的原因，不外乎有人想看「好戲」，她說：「啲人成日想睇我哋唔好嘅嘢，但呢個世界好美好㗎。我同Sonija嘅友誼係其中一樣，佢係我好好嘅朋友，我哋一見面就好好傾，喺呢一行裏面，佢係我暫時唯一毫無保留，可以好信任嘅朋友。」
由傳不和以至做閨中密友，她跟Sonija算不算不打不相識？阿佘笑說：「我哋未合作已經傳不和，初頭拍《帝女花》都會有啲尷尬，經過幾日開工之後，睇得出大家真係想將啲隔膜踢開，大家都好主動攞個心出嚟做朋友。」
無綫花旦爭寵傳得熱烘烘，對於爭寵這回事，阿佘說：「其實大家要拍戲，又要有自己嘅生活，邊有咁多時間去爭風呷醋。只係𠵱家講是非、講不和同講緋聞係娛樂新聞嘅大氣候。」那麼有沒有爭上位？她說：「咁又唔止女仔，男仔都有，呢樣嘢又冇錯嘅，喺唔傷害人哋嘅情況下，爭取自己嘅嘢都正確。」
問阿佘以前曾否被人傷害過，她無奈地說：「有㗎，明明係好朋友，但佢喺人哋面前講你唔好，到𠵱家我都唔相信係事實，可能係我唔想相信啦，但我都唔會擺喺心入面。」
被人出賣過，加上是非又多，阿佘以前會看不開，躲在家中哭，但因自幼喪父的她，母親又長居外地，久而久之變得堅強起來，她說：「以前唔開心，會不停問點解，會喊，但娛樂圈令人成長得好快，跟唔到beat就生存唔到，你又冇得控制人，咁不如選擇做個開心嘅女仔。
「我好多謝媽咪，以前有乜唔開心，我會打電話同佢傾，就因為佢成日唔喺香港，就訓練到自己去解決啲事。」
佘詩曼的是非與緋聞都多姿多采，是真是假見仁見智，但在工作上，她畢竟付出過努力，阿佘沒有受過正式演藝訓練，大家常說她的聲線像蚊飛過一樣。
佘詩曼也說：「以前好驚，拍戲成班人圍住，唔知點咁。」戲可以鍛煉，聲線是天生的，改不了。可是，她不甘心，在電視城內大聲朗讀報紙，雖然搞笑，但又真的有改善，再次證明世上是沒有免費午餐，不是有觀眾緣就「大晒」。
撰文：朱芷瑩 攝影：陳志嵐
場地：雅芳婷（中港城分店） 服裝：SistyrMoon
