佘詩曼與陳浩民拍拖的傳聞甚囂塵上，但阿佘對這位緋聞男友觀察了七個月，至今關係仍徘徊在男友與朋友之間，原因是現年二十七歲的她打算找老公，不想為一時寂寞而找男伴解悶，看準目標才「下手」。
現年二十七歲的佘詩曼，緋聞名單數之不盡，單在過去一年，她先後與陳浩民、張智霖及羅嘉良傳緋聞，當中又以阿佘和陳浩民的緋聞傳得最熱烈，傳了足足七個月，身在台灣拍戲的陳浩民更不時將阿佘的名字掛在口邊。
阿佘對此說：「佢（陳浩民）做訪問時，我都唔在場，我唔知佢講過啲乜，可能說者無心，聽者有意啫，有啲報道同事實係兩回事。」
那麼她與陳浩民到底有沒有發展機會？阿佘說：「要觀察囉，兩個人要認真相處過先可以下決定。佢個人係好嘅，心地都好好，佢係我一個好好嘅朋友，暫時做吓朋友先。其實我𠵱家拍拖，係好想搵個固定對象，希望係老公嚟嘅，唔想嘥時間，我成日覺得拍拖係一門幾高深嘅學問，拍拖對我嚟講，亦都好奢侈，我唔想因為一時寂寞，就求其搵一個人去開始，跟住又好快又分開，呢啲嘢唔係我呢個年紀做㗎。」
令阿佘跟陳浩民的關係裹足不前，會否是過往對方緋聞太多而使她沒有安全感？她竟笑着自嘲說：「應該唔夠我多喎，我要同Sonija（郭羨妮）拍拖至得啦，我覺得呢啲新聞係俾人砌出嚟，用呢樣嘢去衡量，對我都好唔公平。」
最近阿佘跟張智霖合作拍電視劇《西關大少》，當年傳他們拍《十月初五的月光》一劇後，火速戀上，現時二人又被傳舊情復熾，阿佘卻沒好氣地說：「宣傳伎倆，係人都知靚靚（袁詠儀）同ChiLam（張智霖）係一對，我一定唔會做第三者。」
至於傳她曾介入羅嘉良與方敏宜之婚姻，揚言不做第三者的阿佘被拖落水，豈非感到很無辜？她笑說：「都唔係第一次啦，總之我唔會因為是非同緋聞而影響大家做朋友。」
阿佘拍劇時面對那麼多靚仔對手，難道不會戲假情真？她回應說：「拍戲嗰時係會投入，佢肯定係我嘅男朋友，但最緊要識抽離，而我嘅對手通常都結晒婚或者有女朋友，所以我會好清晰。」
入行六年以來，阿佘坦承有圈中人曾向她展開追求，不過她沒有接受，她說：「我驚冇咗個朋友，又驚唔知一齊係咪真嘅，大家一齊做娛樂圈，好似有好多人望住你咁。」那麼她會否因此選擇發展地下情？她說：「睇對方點啦，對方覺得ok就冇問題，𠵱家嘅觀眾都好開通。」
