今回《用車報告》主角Frankie，以往曾在加拿大讀書及工作，響當地駕駛嘅汽車，都係美國款式嘅大型四驅車，就算回港後都想搵部大型四驅車代步；但礙於香港嘅駕駛環境及條件較加拿大複雜，故最後改為選購一部身形較為嬌小嘅本田HR-V。咁究竟有何原因會促使Frankie改變初衷呢？大家不妨一齊嚟睇睇。
記者、攝影：李智佳
逢星期一至日刊出
Frankie直言喺加拿大生活時，一向係以JeepCherokee代步，因為佢覺得呢類大型四驅車，睇位容易兼且駕駛起來又好有安全感，所以回港後亦諗住揀番部呢類型嘅四驅車代步；「但可惜香港油價高，若果要再以一部大型四驅車作座駕的話，所需嘅養車費用定會甚高，實在令人吃不消呢！但HR-V呢類CityRV實用性高之餘，養車費用亦較便宜。故此就算有幸畀我中咗六合彩，都唔會買我嘅DreamCar——JeepGrandCherokee及保時捷Cayenne，因為呢類車耗油量及車價太高，實在難以負擔；另外，如果家陣有朋友想買車的話，我一定會向佢哋推薦本田HR-V，事關佢夠實用及合乎經濟原則嘛！」Frankie笑着說。
「重有呀！其實喺買車前，我都有考慮過本田CR-V同埋越野路華Discovery，但後來發覺Discovery耗油量較高，未能合乎經濟原則，而當時CR-V嘅車價亦較HR-V多出約10萬，因為咁所以我咪揀咗HR-V囉」Frankie一臉正經地說。除此之外，Frankie重話好鍾意呢款Facelifted新版HR-V嘅車頭造型，因為部車本身有四驅車外形設計之餘，又予人一份時代感，再加埋一套17吋合金胎軨（原裝為16吋），響一套原裝包圍襯托下，望落更見有一份跑味呢！
不過，HR-V仍有部份地方係令Frankie感到不大滿意嘅，例如後方視野唔夠清晰，要自行加設廣角鏡才可將問題解決；「我又覺得嗰台1.6公升偈可能由於容積細嘅關係，喺高轉時會發出較高嘅聲浪，但加裝MP7後，不但能改善扭力輸出，就連引擎聲音亦變得好聽好多呢！」
至於車廂方面，Frankie亦大讚空間寬敞闊落，座椅亦有頗高承托性，乘坐舒適度可謂毋庸置疑；另外，車廂設備亦見齊全易用，當中一套RealTime4WD系統，更令Frankie對其讚不絕口㖭！「HR-V嗰套RealTime4WD系統，我覺得真係好啱響城市內道路用㗎！響天朗氣清嘅日子，系統會自行選擇以前輪驅動模式行車，而耗油量平均為每公里約$1.2至$1.3；但喺下雨天，系統便會啟動四驅模式，雖然耗油量會增至平均為每公里約$1.5，但所予人嗰份穩定性，絕對係一般普通私家車難以比擬㗎！」
引擎：1590cc直4SOHC
馬力：125ps/6700rpm
扭力：14.7kgm/4900rpm
尺碼：4095×1695×1580mm
軸距：2460mm
車重：1270kg
新車售價：$149,800
（合群汽車：23802231）
被譽為係新一代CityRV表表者嘅本田HR-V，自在港推出以來一直備受車迷追捧，而且重由最初1998年底嘅三門型號，演變成於1999年11月左右推出嘅五門版，及後代理更於2001年10月，引入埋Facelifted新版抵港㖭！然而，現時熱賣中嘅Facelifted新版HR-V，無論外形抑或係車廂鋪排都予人有一份新鮮感，一台1.6公升直4SOHC引擎，更附有本田獨有嘅VTEC技術，響一套CVT無段變速自動波輔助下，性能表現可謂更上一層樓呢！