雖然近年二手衫褲市場有回落趨勢，但話到底始終總有一班忠心Fans追隨，Trina都係Secondhand擁躉，佢話通常都會去新天地入貨，「呢度有幾間賣二手牛仔衫褲嘅舖頭，我貪佢價錢經濟，有陣時搵到啲好難搵嘅款式，真係好似執到寶咁㗎。」咁筍？一於跟佢去睇睇有咩寶先！
全場最多NIKE二手Tee
入到舖頭第一件，當然係索吓有無一股強勁二手衫味攻入鼻，無嘅？Trina即刻話呢間舖仔其實係禾稈冚珍珠，只要畀心機摷，隨時執到筍貨，尤其係絕迹二手NikeTee，連N年前經典Logo款都有，手快有手慢冇!
唔好以為呢件簡簡單單無咩特別，其實呢件先係全場最貴嘅Tee王，就係呢個紅色大剔最值錢，藍底襯紅剔夠晒經典，家陣都好難搵得番，所以貴得有道理。
在成架二手Tee之中，居然俾佢哋搵到呢件個Logo唔係就咁印落去嘅款式，成件衫最特別係心口剔位個橢圓形係一塊白色皮，細細個NIKE字唔會好誇，洗多幾次都唔怕個Logo會褪色。
呢件Tee最正係心口一大個NIKELogo，重要係呢期至受歡迎嘅BoxLogo，夠晒Oldschoollook，最抵死係件衫已經開始有少少變黃，感覺夠晒殘舊，下面襯番條一樣咁殘舊二手牛仔褲，正！
地址：旺角西洋菜南街1A號新天地商場1樓19號舖
平價買Levi's二手牛仔褲
買得件二手衫梗係要買埋二手褲先算襯到絕，以前買條二手牛仔褲閒閒哋都要五、六嚿水，磨得靚啲有埋貓鬚重唔止，但今時唔同往日，家陣二百五蚊已經可以有條Levi's，Wrangler同LEE重一嚿水有交易，二手fans不妨學Trina咁趁低吸納。
（27702411）
地址：旺角西洋菜南街1A號新天地商場2樓25號舖
問Sylvia同Trina兆萬有咩買，二人不約而同話買玩具，原來呢度有唔少舖頭專賣日本玩具，玩具種類勝在夠多，男女老幼都啱，以下呢兩間就係二人嘅推介，即管睇睇有咩咁正!
絕版Figure此中尋
呢度之所以會吸引咁多大細路，全因佢貨品齊全，由原祖玩具好似鹹蛋超人、幪面超人到時下潮流玩意積木玩具都可以喺度搵到，當中有唔少Figure係限量版、絕版甚至已經停產，如果想搵絕版貨，不妨來此碰碰運氣！
阿榮：「我自己本身都幾鍾意東京暴族呢套漫畫，尤其是主角阿海Figure，我覺得佢個造型好有東京Feel，好切合東京街頭潮流，而且價錢唔係好貴，每次一見到靚我就會買返屋企擺，好似呢個咁，個造型我幾鍾意。」
一樣係出自EricSo手筆，但今次李燦森個造型同以往好唔同，一件皮草，一支大雪茄再同埋支藍寶石權仗，以高貴look示人，只要輕按佢個肚，就會有阿Sam嘅真人發聲，而且全球限量500隻，而香港只會得兩間舖頭有代理，值得收藏。
（23662688）
地址：旺角西洋菜南街兆萬中心2樓222室
獨家日版多啦A夢產品
兆萬有唔少日本玩具店，但就只得呢間咁專一只賣多啦A夢產品，「香港賣嘅多數都係印製品，好少有立體多啦A夢擺設賣。」就係咁老闆不惜千里迢迢走遍日本各地入貨，等多啦A夢迷可以盡情買。
未睇過或者睇得唔夠滾瓜爛熟嘅人可能唔會知呢款叮噹有咩特別，其實呢個造型曾經喺第25期中出現過，佢手執嗰把就係故事中可以令人變得和氣嘅和平天扇，係日本一位設計師專為宣揚世界和平而設計，由造型到用色都與別不同，別具意義。
老闆伍生山長水遠去到日本各地，就係為咗買呢幾隻限定版，每隻都以當地名勝同特產做主題，左起係大阪、伊豆、江戶、飛驒、信洲同北海道，每隻重可以伸手入去玩，遲少少老闆會再入埋其他地方嘅款式，要儲齊一套就要等吓啦！
(21368012)
地址：旺角西洋菜南街兆萬中心1樓105室