董太永遠喺唔適當嘅時候做唔適當嘅嘢，上次喺牛頭角扮超人叫婆婆「洗手、洗手、洗手」，市民都未笑完，噚日又有新搞作。話說董太出席心連心大行動「香港再起飛」，起飛手勢人人都用雙手做，惟獨董太又出怪招用單手，你話咁樣香港點飛得起？
部份心連心大行動發起人私底下話，呢個活動籌嘅錢唔少，做嘅嘢又多過政府，𠵱家係時候告一段落，除咗驚功高震主，另外一個原因係董太有份參與。佢哋話，咪睇董太咁富貴，佢嘅提議好多時都好草根，比得上牛頭角順嫂。
草根唔係話唔好，不過董太有時嘅提議天馬行空，大家都唔知點落實。有大行動中人話，如果嗰個係自己阿媽，一早已經會叫佢唔使理，但對住特首夫人，真係唔知點同佢講「你嘅建議好難做到」。
講開「心連心」呢類民間自發活動，八方知道原來有一日，老董叫齊各沙士慈善團體嘅代表包括田北俊、陳永棋、余國春、王䓪鳴、蔡元雲同林鄭月娥等人去特首辦，睇吓有乜可以幫手，點知眾人一聽就多謝夾盛惠，耍手擰頭話唔使政府操心，佢哋搞得掂有餘。
原本負責協調各方籌款同基金工作嘅何志平，由於冇嘢需要佢協調，於是奉旨交白卷，專心去搞六四同埋七一嘅文娛活動，實行同反對派打對台。
傳真︰2623-9278
電郵︰