曼城喺早前一口氣簽咗施文同泰勒兩個老將後，又有新消息，就係佢哋下季嘅主場同作客波衫胸口將會出現兩個唔同贊助商標誌。
曼城上季升上英超聯時，就同一間商業公司FirstAdvice簽咗三年贊助合約，點知公司因為財政問題，下季無法履行合約，曼城收到通知後，已經另覓贊助商，據講其中一間重係中國公司嚟㖭。不過，曼城新一季主場波衫已經做好晒，胸口上嘅舊贊助商標誌無得改，所以新贊助商標誌都只會印喺作客同埋踢歐洲足協盃嗰件波衫上，而呢個決定亦已獲英超聯賽會同意。
我求大俠記得兩間獲中國商業公司贊助嘅球隊，愛華頓同甲組錫菲聯都有唔錯成績，如果曼城又有中資企業贊助的話，睇吓會唔會帶嚟好運？
近月傳出曼聯領隊費格遜有意搵皇蘇中場艾安素做堅尼接班人，日前艾安素亦回應話佢都好希望可以去英超搵食。問題係𠵱家皇蘇重同皇馬爭緊西甲聯冠軍，要暗示離隊都唔好喺呢個時候啦，一陣軍心不穩就無謂；艾安素咁多口，唔怪得佢突然喉嚨痛踢唔到國家隊啦！
個市咁靜，睇嚟呢個暑假都幾難有重大轉會交易。德國更加有唔少球會受到財困影響，來季組軍方面有心但無財力。最近英格蘭嗰邊聯賽就多咗幾百個球員入失業大軍，唔知德國球會有冇興趣掃貨呢？尤其係班年輕球員，話唔定會有第二個夏格維斯㗎，可以諗諗佢喎！
意大利喺衣着方面不嬲走喺潮流尖端，足球運動都唔例外。意足總宣布以後每年都會換球證衫顏色，而下季起就以全白作為主色，一來易認，二來俾人新鮮感。近年球證衫已經五花八門，「黑衣判官」個名早成歷史，白色就真係創新，希望真係畀到大家新鮮感啦。
喺舊年世界盃南韓對意大利一戰成名嘅厄瓜多爾籍球證摩蘭奴，終於宣布掛「哨」。呢位接連俾厄瓜多爾足總罰停賽嘅球壇小丑，擺明執法有啲問題；但佢又真係俾咗唔少歡笑同埋話題大家，所以我求大俠對於佢離開球壇，心情都幾複雜。
記得NBA網隊班球員喺總決賽首仗輸波後，個個喺傳媒面前發牢騷，鬧教練史葛用兵失策，當時我求大俠重鬼咁驚網隊會出現內訌，第二場對馬刺會不攻自破。點知喺第二朝操練時，班球員轉晒口風，話佢哋只不過係輸波後心情差亂噏。睇嚟史葛同班球員已經閂埋門傾掂數，唔怪得佢哋噚日士氣咁高昂啦！