上個禮拜最矚目嘅新聞除咗恒指升穿牛熊分界外，「上海富豪」被大陸公安監視居住，「富豪」老婆俾老廉請返總部飲咖啡，應該算另一單大嘅財經新聞。今次傳出單咁嘅新聞，重以為啲細價股會跌到一仆一碌，但原來影響冇預期咁大，除3隻停牌嘅股份外，其餘傳聞同上海富豪有關嘅股份，表現並無好似前一排啲股仔俾人斬倉跌得咁勁。
據伏勝所聞，今次班大戶損傷唔係好大，完全係因為佢哋喺4月1日後做咗唔少準備功夫。話說班大戶為咗唔想揸得太多同一隻股份而惹麻煩，就約同幾批不同人馬互控其手上愛股，即使其中一批大戶所炒開嘅股份出事，由於股份分散喺唔同嘅大戶手上，無形中令各大戶所承受嘅風險細咗好多，只要唔係手上所有股份一齊跌，基本上唔會有被證券行斬倉嘅危險。
呢排美國科技股被炒到天昏地暗，有好多隻同電腦相關嘅股份都被炒到飛起，不過唔知係唔係本地大部份投資者喺上次科技股災中損過手，喺心理陰影下，本地科技股嘅鑊氣冇咁勁，更冇乜代表作。
伏勝聽聞早前同電腦藍巨人IBM有搞作嘅文傳（343）又有新動作，話說今次同佢哋合作嘅公司仍然係另一家美國晶片公司，不過就係用人哋嘅科技嚟開發自己嘅嘢，而且好似重同佢哋所開發嘅中文2000系統有關。
據行家講，今次合作有利文傳發圍，因為佢哋嘅市場唔再係本地或者國內市場，而係直指全個亞洲區，所以文傳股價可以睇高一線。
伏勝