林振強係真性情漢子，從來唔作狀，前幾日佢寫一篇關於佢自己唔明白、唔識聽古典音樂，當然絕無虛言。識就識，唔識就唔識，使乜驚俾人話膚淺、冇文化，連古典音樂都唔識欣賞。
左丁山睇完，當堂有勇氣下筆，因為自從名采版有咗幾米失樂園漫畫之後，自己日日睇，都唔識欣賞，唔知幾米想發表乜嘢意見，覺得幾米係自從「壹傳媒」創辦以來，最識得扮高深嘅作者。可謂係「不求傳真，只扮高深」。本來呢啲說話想收埋喺肚入面，驚怕講出嚟，會俾人鬧膚淺、老餅、out咗、冇文化嘅；不過既然林振強哥哥大大聲話明自己唔識古典音樂，左丁山都不妨講一聲，我唔明白幾米講乜。
曾經問過幾位老友，惡佬明話：「我哋地盤佬，邊識幾米嘅寓意呀，只係識睇尊子啫！」惡佬明一出聲，成班友即刻唔敢扮高深，人人都話睇唔明。卒之藝術B出聲話：「幾米喺台灣好受歡迎，大陸亦有唔少人鍾意，香港當然有幾米擁躉，佢啲筆觸好後現代㗎！」乜嘢叫做後現代？藝術B多講咗一輪，左丁山叫佢不如寫一篇文交畀高深嘅《信報》發表，《蘋果》啲讀者只求傳真，未必睇得明㗎！藝術B係MFA（藝術碩士）兼設計學碩士，我哋叫佢做兩嚿石（雙碩士），對我哋講藝術，一言九鼎。講到最收尾，問佢點睇幾米嘅「藝術」？佢話：「都係尊子好！」佢話幾米嘅畫工未過關，至於佢啲文字，你自己去領略咯，有時高深過佛偈㗎！