王家衞呢輪都好唔得閒，一方面要幫《2046》埋尾，一方面又要為港人打氣嘅《1:99電影行動》拍宣傳短片。
另外，佢又籌備緊一部有關非典型肺炎嘅愛情片，佢諗住搵中港台三地嘅導演各拍一個古仔，因為三地都俾非典型肺炎搞到雞毛鴨血，當中有好多感人個案發生，王家衞好想將一啲鮮為人知嘅動人愛情故事搬上銀幕。
王家衞初步構思三地都起用新人導演，至於演員會由導演自己決定。而香港嘅版本王家衞就想搵黃秋生嚟演。秋生之前都答應咗會客串《2046》，佢一向都幾欣賞王家衞，所以就算只係做佢監製嘅戲，秋生都唔會拒絕。
譚耀文同恬妞噚日喺元朗鬧市拍電影《阿龍的故事》，講述譚耀文飾演嘅中度智障青年同佢阿媽恬妞喺街邊靠賣白粥同炒麫維生，但恬妞最終因感染非典型肺炎而死。
《阿》片嘅故事內容同譚耀文曾主演嘅電影《笨小孩》幾似，問譚耀文點解鍾意演智障人士？佢話：「可能我彈性大，加上《笨小孩》成日重播，俾導演印象較深。」
鄧小艾有份嘅「楚留香」酒樓，早前因為非典型肺炎休業，噚日下午重開業。小艾話：「專登揀今日（即噚日），六六無窮好意頭，酒樓重整過晒啲冷氣同全場消毒，呢個月所有顧客免收加一。」問到小艾休業期間有冇諗過執咗佢，佢話：「間酒樓開咗十八年，係阿爸留低，又唔使畀租，所以都可以繼續做落去。」
林子祥（阿Lam）日前做汪明荃演唱會嘉賓時跌傷後，一直喺法國醫院留醫，不過呢幾日去探佢嘅朋友就少咗。阿Lam契女黃詩詩（小圖）前晚都有去醫院，記得佢初初去探阿Lam時表現得好唔開心，但前晚佢情緒已平復，黃詩詩話：「阿Lam情況好好。」
早前星皓電影話會開拍賀歲片《九美狐》，重話搵咗滕原紀香、孫燕姿、關之琳同范文芳等美女演出。點知范文芳日前接受馬來西亞傳媒訪問時，就否認星皓有傾過佢，范文芳話係有片商搵佢開戲，但唔係呢套。對於《九美狐》有咁多靚女參演，范文芳就質疑套戲究竟開唔開得成，佢話：「有這麼多美女，可以嗎？那不是很貴的電影？」
