早前有報道指宣萱嫌新劇《樊梨花》的對手馬德鐘卡士太弱，繼而便傳出二人不和的消息。但宣萱和馬德鐘昨日碰頭時，表現得老友鬼鬼。馬德鐘表示跟宣萱相識良久，完全不覺得遭嫌棄。
宣萱、馬德鐘、歐倩怡和羅敏莊等，昨日在將軍澳電視廣播城出席無綫新劇《樊梨花》開廠拜神，早前有報道指宣萱嫌棄對手馬德鐘的卡士不夠，二人因此不和。不過宣萱和馬德鐘昨日雞啄唔斷又搭膊頭，實行以行動闢謠。
宣萱對此說：「我唔知有呢件事，冇人話我知，唔怪得今日記者猛叫我哋合照，呢套劇開工二十日，大家合作得好開心，冇人搞新聞亦冇人遲到。呢套係我咁多年第一次擔正嘅劇，我覺得最緊要工作得開心。」對於緋聞男友吳京來港演出《心連心．香港再起飛》晚會，問二人可會相約吃飯，宣萱說：「我都冇時間，上次成班人食飯都俾人寫成咁，如果兩個人食飯都唔知點算。」
馬德鐘則表示跟宣萱合作愉快，他說：「宣萱份人好好，雖然好多打戲，但都冇意外發生，我亦唔覺宣萱嫌棄我，大家識咗好耐。」
另外，歐倩怡對於被拍得在跑車煲煙，她說：「做演員應該識食煙，自己間中會吸一支，但就唔係成日食，有mood先食，安仔（郭晉安）話我呢次乜嘢形象都冇晒，我自己都失策。」
採訪：楊潔雯
攝影：林德雄
