電盈（008）批股，大東賣晒14%電盈，每股4.78元。電盈收5.20元，較停牌前只係微跌5仙，但高過批股價成9%，有份獲批股者賺得唔錯。本來，市場流通量即時增加30億貨，對電盈股價不利，但股價仍然硬淨，理由係不明朗因素消除，以後唔再怕大東會出貨。另外嘅原因，有啲貨落喺強者之手，唔會好似散戶咁賺幾個巴仙利錢就散水。電盈近期落後，亦係撐住股價嘅理由。
電盈股價叫做微跌，但啲電盈Call輪則炒到出煙。9662收8.8仙，升52%，唔係乾炒，有13球金額，9月到期，溢價21.9%，槓桿率11.8倍。9637收2.5仙，升47%，11月到期，溢價44.7%，槓桿率41.6倍。
啲電盈Call輪升得咁勁，係預咗正股轉勢向好，升定嚟等。所以，下周電盈若然上升，昨日急升嘅電盈Call輪唔易再升。
炒電盈Call輪，9662同9637槓桿率夠爆，想實際啲，可以揀9791，昨日收1.14元，只升得3.6%。隻輪明年3月到期，溢價8.5%，槓桿率4.6倍。
講番9637，夠膽賭就要夠膽輸，輸嘅機會真係好大，11月之前正股如升唔到7.4元以上，則隻輪會作廢。當然到期之前最低都有1仙，輸晒都有數得計。
章盛