今日市民買樓，價錢最實際之外，屋苑內嘅康樂設施都好重要。東涌嘅海堤灣畔，恒基當勞張（張炳強）就話，個盤喺「沙士」爆發後，由復活節到今日，累積賣咗二百間，成績唔錯。
雖然話東涌呢個新發展區有地鐵，放假出去消遣好方便，但亦有不少住戶唔想舟車勞頓，想留喺區內玩。
啱啱完成各項工程嘅海堤灣畔第五座，屋苑花園設有玩模型遙控車嘅賽道，賽車發燒友閒來可大展身手，較量一下。
如果唔鍾意玩賽車，可以考慮放船仔。喺遙控車賽道嘅另一邊，有個玩遙控模型帆船水池，水陸兩樣玩晒又得，各適其適。噚日難得何太（何伍燕榆）同當勞張抽空入東涌玩一轉，兩位砌完車又放船仔，笑到好似大細路。
地產代理成日都話，置貸客係樓市重要支柱，因此，利嘉閣噚日特登搵咗個置貸客盧小姐，現身說法。佢已經入咗兩張票，準備買藍澄灣。
盧小姐已申請置業貸款，市場上咁多個新盤，佢話「首選都係藍澄灣。」點解？因為佢好鍾意樓盤嘅二百米泳池，而發展商提供嘅家具套餐都相當啱使，加上佢係置貸客，有額外樓價折扣，價錢又合理云云，答得頭頭是道，成個精明消費者咁，利嘉閣真係無揀錯人畀傳媒做訪問。
另外，利嘉閣相當睇好置貸客嘅潛力，噚日重特登封咗五個經理做「置貸先鋒」，由和黃徐建東逐個加冕，場面好似選港姐一樣。
長實執行董事趙國雄每次見傳媒，都有無限驚喜。集團牽頭發展嘅荃灣朗逸峯，好快就會賣樓，為咗要突出樓盤樓底高達十一呎六吋，高過一般住宅，鬼馬嘅趙國雄，化身為手持籃球嘅專業籃球員，以及風度翩翩嘅紳士（重同美女共舞），身高五呎十一吋嘅趙生，企係示範單位裏面，頓時間變成小矮人。
為咗令蘭西能夠親身感受高樓底感覺，噚日發展商重喺中環長江集團中心大堂，展示一把有十一呎高嘅巨型尺，兩邊分別掛上一盞水晶燈，一邊樓高九呎，另一邊樓高十一呎，但其實無論蘭西企係邊一邊，都覺得自己好渺小。
香港管理專業協會舉辦嘅第三十五屆傑出推銷員，梗係唔少得地產代理行業，中原地產透露，今次佢哋總共有四個代理攞到呢個獎。
原來呢個獎分兩個組別，年齡二十五歲以上嘅就列入DSA（傑出推銷員獎）組別，細過二十五歲嘅就屬於OYSA（新晉推銷員獎）組別。
中原輝煌臺分行簡汝明、新九龍海防道分行石寶德，同埋荃豐分行嘅丘漢雲，齊齊喺DSA組別攞獎；而綠楊分行嘅丘漢偉就喺另一組攞獎。
蘭西
電郵地址：
