Que仔紅過人　日星養一隻嫌少
片瀨那奈繁殖芝娃娃大家庭

呢排日本最紅嘅新星係邊個？我諗唔少日本人會答你係兩歲嘅芝娃娃狗Que。Que仔拍咗個廣告之後，紅遍全日本，重令日本興起養芝娃娃熱潮，女星片瀨那奈同「超人」賀集利樹人有我有都養番隻，而島谷瞳等藝人，亦拎隻狗仔出嚟晒吓命！

片瀨那奈撮合狗男女
靚女片瀨那奈兩隻狗個名都幾有趣，男嗰隻Maron同濱崎步嘅愛犬一樣名，而女嗰隻MontBlanc就直情係來路名牌筆個名，不過片瀨話冇心抄喎！呢位狗主人好希望撮合呢對狗男女，佢話：「芝娃娃細細隻咁可愛，如果佢哋結到婚，生一堆狗仔就可以有個大家庭！」

賀集利樹惡狗看門口
身為《幪面超人阿傑多》嘅賀集利樹，為人十分斯文，但係佢養嗰隻芝娃娃Hustler就好鬼惡，佢只要喺電視機見到有狗仔出現，就起勢咁吠，似乎Hustler都幾適合做「幪面超狗」喎！

島谷瞳癡心情長狗
歌手島谷瞳話，佢唔會因為流行養芝娃娃就跟風，事關佢同愛犬More感情深厚，由隻狗周身病養到𠵱家健健康康，每次More企喺門口等島谷瞳沖完涼，都會令佢好開心！

仲根霞治狗有一手
咪以為仲根霞淨係識得拍水着性感相，原來佢訓練狗仔都有一手，重試過喺雜誌教人㖭。仲根霞話，佢𠵱家已經當正陪伴佢多時嘅迷你臘腸狗Maria係情人㗎啦！