舊年睇格林披治大賽車直播，開賽時一見到兩架紅色法拉利衝出，幾乎可以轉定台，因為舒密加多數由頭帶到尾，賽事平淡到極。
今季唔同咗噃，法拉利冇乜優勢，係蒙地卡羅（摩納哥）大賽，一隊二十年冇贏過嘅威廉士車隊居然搶到冠軍，舒密加只得第三名，平唔到冼拿贏六次蒙地卡羅大賽嘅紀錄。據講舒密加排位排第五，搶唔出，故此輸咗。
議員請食飯，在座者有一位名車大偈，對賽車非常熟悉。佢話法拉利贏足幾年，賽車直播嘅收視率一路下跌，皆因法拉利佔太大優勢，全世界觀眾都轉台。現代職業體育全靠商業贊助與電視轉播費，商業贊助好睇收視率，如果冇人睇電視直播，高昂贊助費就會無價值。有見及此，賽會今年改例，（一）廢除試車一個鏡頭，取最快圈速嚟定排位，（二）試車與正式賽車需要用同一部車，試完車就鎖車，到比賽時解封。
咁樣一來，大車廠（如法拉利）就會無過往優勢，過往法拉利特別為試車排位賽而使用特強馬力賽車，贏晒小車廠（佢哋冇資源做兩副engine），正式賽車就用另一款。所以舒密加在排位賽經常勝出排頭位。此外，今年只准試兩圈，贏唔到就算，舒密加點可以次次贏到吖。
賽會如此苦心，都係希望F1比賽更加刺激，更加好睇，用以挽回收視率，故此Williams都贏到一次，打破悶局。NBA改球例，乒乓波改乒球體積，女子排球員穿V字短褲，背後完全為咗收視率，我哋做電視觀眾，權力好大㗎。