今晚直播波好戲連場，既有英式踢法嘅蘇格蘭大戰德國，又有技術細膩嘅西班牙大戰希臘，重有比較少睇到嘅北歐波丹麥對挪威，無論齋睇波定係鍾意玩番兩手嘅球迷，都應該會有個充實嘅晚上！
喜歡玩番多少考吓眼光，睇波時候更投入嘅老友記，今晚想心靈及「荷包」都真正感受到充實嘅感覺，當然要睇住我哋《蘋果波經》各路名家嘅貼士啦！呢期最醒嘅青蛙仔，就同我求大俠講明今晚吼住「捧上盤」呢個宗旨，一定有所得着咁話；原因係𠵱家幾個主要聯賽收咗「咧」，球員都可以心無旁騖咁為國家隊效力，自然會容易出現優勝劣敗嘅結果啦！佢重推介大家要吼實頭場德國呢個上盤，各位收到未呀？
之前同J-League球會橫濱水手簽約加盟嘅卡富，眼見原來重有唔少大球會，好似AC米蘭咁對佢有興趣，近日終於同橫濱水手取消咗張加盟合約，決定再戰意甲！我求大俠就覺得做人最緊要重承諾有口齒，你卡富咁樣出爾反爾，真係一個反面教材囉！
日本已公布喺八月初，皇馬及AC會喺佢哋國家運動場，分別對J-League球隊東京FC及鹿島鹿角，作為亞洲之旅熱身賽。之前我求大俠都聽過佢哋話會嚟中國踢表演賽，但因為「沙士」而無晒聲氣；𠵱家佢哋定咗日本之旅，希望都諗諗已撤銷旅遊警告嘅香港啦！
估唔到軒寧人仔細細，婚後實力依然，重喺法網賽四強打低莎蓮娜！但「細威」賽後就喊晒話輸得唔抵，既鬧軒寧冇品，又賴球迷噓佢。我求大俠就覺得成日俾你兩姊妹玩晒好悶啫。而呢次亦係個好機會俾佢表現吓風度，點知佢就輸唔起，枉我一直咁仰慕佢嘅……才華！
舊年十月俾斯特拉斯堡炒咗後一直冇嘢撈嘅巴拉圭門將捷拉華，上個禮拜同巴拉圭足總唔啱牙，憤而離隊，冇份鬥葡萄牙；點知佢日前突然又話，如果足總方面向佢道歉，就有數傾，可以返國家隊。但係我求大俠就要話畀大家聽，其實佢𠵱家體重暴增至二百二十磅，點打波呀？佢睇嚟想搵下台階，但係足總睬你都儍啦。
列斯後衞米斯話如果球會要賣人，佢會「推介」門將羅賓遜！因為賣走基維爾或維杜卡，好難搵人代替，但羅賓遜走咗重有馬田！話晒羅賓遜上季重同你米斯並肩頂住個後防，竟然咁講都有嘅！咦？加利基利都可以頂到你個位噃，不如賣走你吖！
逢周六、日見報