港股午後升勢擴大，最高升至9752，收報9695，升55點，成交97.23億元。港股上升，主要是市場憧憬美股周五反彈，此外據聞可能有歐資趁歐元處於高位而流向美股。
電盈（008）復牌後只輕微跌破5元關口，即獲得承接，收報5.20元，跌幅不足1%，而成交則高達9.36億元。黑客話，今次大東沽清電盈後，股價未見大散，真係要多謝花旗美邦，聽講話有人收起晒啲貨，好多靠今次配股來平電盈淡倉嘅投資者都攞唔足貨，有部份只攞得10-20%認購額，因而要在市場掃貨。呢班電盈淡倉客睇死大東批股而造淡電盈，如果唔能夠把握大東批股來食胡，後市隨時被人挾到暈。聽講今次電盈批貨，唔少落入對沖基金手上，可能已有人正在部署挾淡倉。
尾市傳出盈富（2800）吸納中遠太平洋（1199）及裕元（551），兩股成交分別大增至3.8億元及5.6億元。下周兩股將成為恒指成份股，繼盈富掃完貨後，相信兩股跑贏大市之走勢將告一段落。
東方魅力（198）早前宣布民企星美傳媒董事長覃輝將入股，但入股交易一拖再拖，市場傳聞交易已經告吹。不過市場又傳出有軍方背景嘅保利集團有意入股，股價隨即炒高30%至4.7仙。阿虎有少少懷疑呢個消息，因為保利集團本身在港都有兩隻殼，就係新海康（119）同保興投資（263），重要咁多殼做乜呢？
德發（928）早前傳出大股東批股，最後傳到因為冇人接貨而告吹，搞到股價受壓，其實德發大股東前日宴請證券界時已否認減持配股，噚日反彈3%，收報0.68元。
阿虎