裕元集團（551）下周一正式成為恒指成份股，一如其他恒指新貴，都係最後一日有人搶貨，臨收市前被掃高，魚缸傳聞又係盈富基金（2800）買貨。
如果唔係裕元呢個龍頭大哥坐鎮，睇怕其他鞋股如信星集團（1170）、新灃集團（1223），甚至投機味較重的新怡環球（1094）亦唔會炒到翻天覆地。
經紀黃話，其實股價升咗唔少，同埋大股東剛剛批完股嘅港台集團（645），亦有望加入熱炒行列。港台大股東以每股0.98元，配售3500萬股。配股後港台股價異常硬淨，噚日再升3.77%，收1.10元。
經紀黃話，港台截至去年9月的半年業績，大升6.54倍，有成2642.8萬元，主要由美國市場帶動，如無意外，港台7月公布業績，應該有睇頭。
至於大股東減持，佢唔覺得有問題，皆因以往街貨唔多，隻股始終流於乾升格局，家陣街貨多咗，某程度上，芬佬或者更高興。
慕容小初