有設計師唔做，放棄4A廣告公司嘅高薪厚職，Teresa只求興趣，創業開設多年夢想嘅西餅店「TeresaFestival」。最初佢只喺屋企做蛋糕畀朋友品嘗，三年半內，經過唔少挫折才得到現時嘅成果，在行內亦有點名氣。
記者：梁煒健
攝影：陳智良
「喺廣告公司當設計師時，根本就唔識整蛋糕，自己喜歡食甜品，就去上堂學，誰知只學到好皮毛嘅技巧，要自己慢慢摸索，摸摸吓竟然有人喜歡食我整嘅蛋糕。當時放工後才Freelance整蛋糕賣，好多時做到半夜四點，如是者秘撈一年，後來興趣愈嚟愈大，就索性唔返工，膽粗粗自資開餅店，當時屋企人梗有反對啦！」
「開餅店時，唔識攞貨，材料只識喺Supermarket買返嚟，又貴又唔靚。最慘自己冇正式師傅單對單教，搞到啲蛋糕有偏差，又唔識控制生產，經常有FoodWaste。」
「初初開舖時係OneManBand，自己開舖、做餅、賣餅兼落閘，收舖後又要繼續留喺度做蛋糕準備第二日賣，經常要凌晨兩、三點才走人。開張嗰陣又係冬天，天寒地凍真係唔易受。」
日夜都開工，男朋友冇怨言咩？Teresa回應：「雖然我渴望有個家庭，但我唔想俾人綁住。開舖嗰陣都有拍散拖，但整蛋糕係我最大興趣，興趣大過天，最後就分手收場。」現在餅店已上軌道，感情也有着落：「家陣有個固定男朋友，拍拖已有兩年，感情頗穩定，至少星期六、日晚都有時間見面，加上呢個男友Share到我開餅店嘅喜悅同努力。佢之前唔食甜品，家陣至少肯試我整嘅新產品。」
但如果愛情與事業只可揀一樣，Teresa仍肯定地說：「我一定放棄男人！家陣餅房大咗開支又大，要開班教人整蛋糕先可幫補吓，若男朋友唔知趣就寧願放棄。」除開班授徒教人整蛋糕，Teresa又開始學插花替人訂做，真係好學不倦呢！