MiniCookies前晚擔任樂隊野仔的音樂會嘉賓，稍後她們要穿着高跟鞋跳舞，實行大個女轉新形象，故前晚成員Stephy特別穿上高跟鞋先行練習，避免日後跌倒出洋相。
樂隊野仔前晚在灣仔藝術中心舉行「Donald別館野仔同樂會」，請來林一峰和MiniCookies擔任嘉賓。
見MiniCookies成員Stephy穿高跟鞋出現，原來她們稍後會穿高跟鞋跳舞，故現在Stephy先穿來練習。
Stephy說：「我哋排緊首新歌叫《貪你可愛》，公司搵咗設計師幫我哋做衫，到時我哋唔會着制服，大家嘅衫都唔同，設計師重話要着高跟鞋，我咪練定先囉，我怕第日仆親嘛，𠵱家着兩吋，可能將來愈着愈高。」Miki附和說：「係呀，唔好着死波鞋，要進取啲，大個女啲嘛。」
MiniCookies的新碟預計下月推出，不過早前有報道指前Cookies成員到處𠝹仔，Gloria又漸發福，Miki對此說：「我知Gloria去咗泰國旅行，佢都唔係肥咗好多啫，佢原本話去澳洲進修英文，但𠵱家返嚟會考先，佢個紋身假㗎，都甩色啦。」Miki又透露稍後有機會與前Cookies成員同台演出，但以甚麼形式合作則要賣關子。
此外，前晚野仔表演時十分興奮，成員少爺占叫歌迷站到台前跳舞，但只有二十多名歌迷和應，其中更有歌迷將螢光棒擲上台，少爺占則拾起拋回台下。
問MiniCookies會否覺得少爺占此舉太危險？Stephy說：「我睇唔到喎，或者少爺占知道下面有人會接住先丟呢，可能佢太high。」
採訪、攝影：駱華齡
