環境運輸及工務局局長廖秀冬噚晚出盡風頭，皆因冬姑喺香港記者協會嘅三十五周年晚會上作壓軸表演，以鋼琴彈奏蕭邦名曲，加上班慢駛嘅綠的司機話不見局長不罷休，於是大班記者就成晚追住佢訪問。
冬姑噚晚除咗彈琴，重有上台致辭，講吓佢做咗十個月局長嘅感受，冬姑呻咗成半粒鐘。其間佢講咗一則新聞──話美國有位著名小提琴家最近演奏時忽然斷弦，四條弦剩番三條都彈到，寄語香港人巨變當前都要保持鎮定。但「明耳人」都聽得出佢「巧婦難為無米炊」嘅心聲。
而嘉賓之一、抗炎勇士鍾尚志亦有上台多謝傳媒，佢話「傳媒救咗香港，救咗我哋，YoukeptHongKonghonest（你們保持香港誠實）」。田二少北辰就上台獻唱張國榮（Leslie）嘅名曲《風繼續吹》，冬姑慷慨贊助二千蚊，但條件竟然係要九鐵減價。八方之前同田二少傾偈，佢話原來多年前佢住喺溫哥華時，同Leslie、唐唐（唐鶴德）係「鋤弟友」，當時溫哥華生活苦悶，華人圈子又細，於是佢哋就成日「鋤弟」，因為佢同Leslie住得都算近，𠵱家講起都不勝欷歔。
噚晚都發生唔少怪事，民主黨買嗰張枱竟然編咗23號，唔通有人整蠱？民主黨有人就將個tablestand掉轉，變成「反23」，另外噚晚一共籌到二十三萬，又會咁啱嘅。
傳真︰2623-9278
電郵︰