市場氣氛樂觀，投資者專揀好消息炒，壞消息往往當作透明或十分容易消化。周四晚美股經濟數據其實欠佳，但杜指最後拗腰成功，倒升2點，收8969。
趙飛雲周四午市見港股回跌之勢明顯，偷雞買入恒指Put輪9715，獲得甜頭，原本打算即日收割獲利，但見到港股尾段反彈無力，於是博美股周四晚調整，9715揸過夜可以賺深啲，結果好夢落空，但昨日早市好淡窄幅拉鋸，趙飛雲當然唔肯計數磨爛蓆，誰知港股午市甫開即急升，雖然慌忙跳車，但9715仍要倒蝕1格離場，正式係偷雞唔到蝕把米。
恒指午市高見9752，最多升過113點，但尾市回吐亦急，最後只升55點，收9694。恒指全周升207點，升幅2.18%，是連續第6周上升，記憶所及，恒指99年開展大牛市升浪時曾試過連續急升8周。按周線圖技術指標分析，恒指仍有上升空間，不過上次港股牛市升浪是科技浪潮，而港股現時仍未搵到升市主題，兩者相去甚遠。
今次反彈浪遲遲未出擊，主要是未搵到大市上升主題，美股展開第2波科技浪，但港股真正科技股不多，或已升得太多。上周提過偉易達（303）當10日線由跌轉升時可以留意，10日線已回升2日，昨日在5.55元買入2萬股，首個目標5月頂部5.85元。
趙飛雲