自九九年警隊大幅削減輔警巡邏時數後，警隊同輔警嘅爭執就未停過，過去三年更先後多次喺立法會上提出討論，香港輔助警察委員會噚日又喺立法會保安事務委員會會議上，指摘警隊多番阻撓佢哋組織協會，出席會議嘅助理警務處長陳德立就連聲否認，只係話輔警已經有一個內部常設委員會，供員工反映意見，警隊認為輔警毋須再成立一個協會為員工爭取福利。
不過，所有出席會議嘅立法會議員都批評，警隊跟本唔肯同輔警協會溝通，佢哋強烈要求警隊應該讓步，聽取一下協會嘅意見。
張文光更揚言，負責晒雙方首次會議所有汽水同西餅嘅費用，但陳德立始終冇話會接納議員嘅意見，劉江華就要求由保安局局長葉劉淑儀出面調解，但保安局代表嘅官員即刻話唔需要去到咁高嘅層次，佢相信警隊會考慮議員嘅建議。
傳真︰2623-9278
電郵︰