世衞撤銷旅港警告後，輪到美國降低對港旅遊警告，相關行業股份彈出，國泰（293）由9.90元彈上10.35元收市，國泰嘅大股東太古（A,019）與中信泰富（267）亦有進帳，分別添身價70仙與30仙。
國泰Call輪9810收20.2仙，升6.9%。明年4月到期，溢價5.3%，槓桿率5.1倍，唔貴，不過正股可能要回一回氣先再上，吼平啲至買。
太ACall輪9660收42.5仙，升9%。明年1月到期，溢價8%，槓桿率8.3倍。正股距3月36.80元唔多，𠵱家買Call輪恐怕水位有限。
中信Call輪9646收13.3仙，升3.9%。隻輪明年3月到期，溢價11.9%，槓桿率11.2倍。正股有機會上試15.50元，若有平貨，不妨買些少Call輪。
旅遊業算係有好消息，中旅（308）收1.22元，反跌1仙。好消息已大致反映喺股價身上，𠵱家距離沙士爆發前高價1.43元重有水位，但唔適宜望股價會見番當時高位，始終沙士事件都影響咗中旅嘅生意。隻公司輪763愈嚟愈近埋單日子，月底夠鐘，現價2.9仙，單日散26%，溢價2.4%，槓桿率42.1倍。炒呢件，準備冇晒。行使價1.22元，正股同行使價一樣，去到尾，正股升唔上1.25元，則隻輪好難搵人要。
章盛