大市終於出現中期見頂訊號。噚日市勢高開低收，成個單日轉向格局，恒指最高9780，升118點，但午後有不利消息傳出，市況急轉直下，結果倒跌收場，恒指收9639，跌23點，成交更大增至107億元，係今次反彈市的最高紀錄，大戶明顯在高位營造淡勢。大成交衝唔上，反而掉頭回落，中期調整開始。
噚日聽到兩個消息，第一個係有一間大行出報告話要減持國企股，特別係鋼鐵同鋁業股，由於此類股票近期升幅頗大，消息一傳開，股價隨即由高位回落，連帶其他化工股亦出現拋售。鋼鐵股以重鋼（1053）的跌勢最急，由高位1.47元直插到落1.37元，倒跌6仙，跌幅4.2%，而石化股的北京燕化（325）亦下跌3.6%。
其實，國企升咗咁多，唔少大行都對後市有所保留，但亦有大行看好個別股種的前景。例如有間大行就睇淡能源企業股，認為內地電費雖有機會上調，但預料增幅有限，電力股近期急升，已超越其合理價值，因此調低電力股的投資評級，北京大唐（991）及華能（902）由「持有」下調至「收集」，而山東國電（1071）則由持有降至減持。不過，另一間大行則推介吸納電力股，北京大唐目標價為4.8元，華能則為11.0元。
第二個消息，就係響芬佬處聽番嚟，佢話本港一家大行嘅No.2，一直都睇淡個市，而且造咗唔少淡倉，但畀呢輪個市挾到失晒魂，佢睇噚日午市個勢，呢個2號人物已開始反撲，相信唔使幾耐，市場就會有預言，話恒指會跌到幾多點，甚至再創今年新低亦唔奇。
大市升咗咁耐，早已預咗要調整，但筆者唔睇得咁淡，以調整今次升幅的0.382計，恒指落到9200水平應該守得住，亦即補番9314至9411的上升裂口，整固後再上，因為唔少股票早已升破250日線，而且一浪高於一浪。
海爾中建（1169）在0.27元至0.29元之間牛皮整固3個禮拜後，噚日走勢再現突破，高收0.3元，升5.2%，以大成交突破降軌阻力，今個升浪，以量度升幅計，目標指向0.4元。海爾中建有注資同股權轉讓概念，呢類消息股隨時會發圍。
郭兆誠