美國疾病控制預防中心降低對本港嘅旅遊警告級別，竟然同經濟發展及勞工局局長葉澍堃有關？原來噚日葉局長出席「同心為香港」時，俾活動發起人周梁淑怡笑佢腳頭好，佢呢排出席啲宣傳香港嘅活動，都為香港帶嚟好消息。
早排葉局長參加本地一日遊，喺大埔許願樹許下願望，希望香港經濟好轉，同日下晝世衞就撤銷旅遊警告。佢噚日出席刺激市民消費嘅「同心為香港」活動，美國咁啱又降低對香港嘅旅遊警告級別。葉局長咁好腳頭，八方覺得佢應該多啲出嚟，咁樣香港好快就可以連疫區個名都除埋。
另一邊廂，一班打沙士嘅科學家就頻頻露面接受掌聲，港大最新出版嘅校友刊物就製作咗個名為「疾病神探」嘅專題，介紹多位專家嘅「緝兇」過程，連中招學生亦第一身講述感染經過，而其中一個章節更有條好突出嘅標題「大學沒有收起可能賺大錢的發現」，弦外之音係乜，相信唔使八方多講，而成份刊物嘅高潮，係登咗多位處理沙士嘅醫學界人物相片，清一色係港大舊生。
港大咁威，唔怪得聖保羅書院小學嘅師生同家長發起咗一個「向香港科學家致敬行動」，將籌得款項捐畀港大，包括小朋友嘅零用錢。
徐立之校長聽日上晝更會同梁志清教授，齊齊跟聖保羅書院嘅「科學家小學生」，交流做大科學家嘅心得。
（圖）葉澍堃（左）俾周梁（右）讚，梗係笑逐顏開啦。
凌樹輝攝
傳真︰2623-9278
電郵︰