一班歌手前晚喺香港大球場出席新城電台舉行嘅《活力香港強身健體Show》，新城今次搞騷嘅時間都幾尷尬，由黃昏六點幾開始到九點幾結束，加上大部份觀眾都係一家大細捧場，由於眾多表演嘉賓中，以譚詠麟（阿倫）同李克勤最受歡迎，幾乎九成觀眾睇完佢哋兩個就走人。
阿倫同克勤七點幾開始表演，好多觀眾睇完「左麟右李」後，就陸續走人拉隊去食飯，搞到之後出場嘅黃凱芹、DoubleR、麥浚龍同葉文輝等，表演時只剩番十分一觀眾。
其中黃凱芹落台同觀眾握手時，行咗好長一段路都係空櫈，場面都幾尷尬。
黃凱芹話：「我嚟嘅時候已經見到好多人走，大會話觀眾一家大細去食飯喎，我都明白，冇所謂啦。」至於喺阿倫同克勤之前出場嘅歌手就比較着數，好似梁漢文、E-Kids同郭富城咁，起碼可以對住多啲觀眾表演嘛！
混血名模Rosemary噚日一身性感泰山裝，喺尖沙嘴出席內地手機記者會，重即場獲贈有攝影功能嘅新款手機。原來Rosemary試過兩次唔見手機，佢話：「一次就漏咗喺的士，一次就喺九龍公園嘅廁所，我放低喺洗手盆邊洗手，一轉頭手機就不翼而飛。」
自認烏龍嘅Rosemary又試過坐的士唔見銀包，好彩最後失而復得，因為個的士司機送番銀包畀佢。
蔡慧敏被指喺九七年向一男性朋友借貸十一萬五千元，但只還咗五萬六千蚊，拖欠五萬九千。債主噚日喺小額錢債審裁處，向蔡慧敏追討欠款，但蔡慧敏冇親自出庭，由兩名代表人應訊，最後同申索人一方無法達成和解，案件押後至呢個月十七號再審。
案件編號：SCTC3344/2003
薛家燕（好姨）噚日去銅鑼灣、旺角同尖沙嘴，出席任代言人嘅纖體產品花車宣傳。好姨瘦身後，特別打扮性感到場，重得到好多途人圍觀，其中有一個印籍男人重眼甘甘咁望住佢，好姨話：「個男人嘅眼神好凶，我都有啲驚，所以匿咗入舖頭，好彩現場有兩個扮公仔嘅宣傳人員，順便搵佢哋保護我。」
最近無綫明珠台再購入近兩小時嘅米高積遜（MichaelJackson）特輯，名為《米高積遜小電影》，安排喺明珠台今晚播出，特輯中米高積遜重會同米高佐敦打籃球。
而米高積遜嘅好朋友伊莉莎伯泰萊為咗米高積遜嘅私人遊樂場Neverland，重專誠送咗隻大象畀米高做禮物。
