今屆NBA總決賽嘅其一賣點，係兩隊一老一嫩嘅控球後衞傑特同柏加鬥法；對於馬刺新星柏加嚟講，今次比拼除咗為球會贏取冠軍指環外，就係要保住自己嘅飯碗。
因為近呢幾個月傳到「㷫烚烚」，話網隊老將傑特若然今屆攞唔到冠軍，就好大機會來季轉投馬刺懷抱，同佢老友鄧肯合作，若果成事，最大危機好自然梗係打同一個位置嘅柏加啦。唔怪之得柏加喺噚日嗰場波上半場冇乜表現之後，下半場醒番，第三節就攞咗九分，重要做咗唔少協助隊友鄧肯嘅攻勢，咁啱傑特又表現奇差，攞得十分之餘重試過連續射失十球㖭！
雖然二十一歲嘅柏加首場贏咗傑特，又勝在後生；但聽聞馬刺對經驗十足事業正處巔峯嘅傑特好有興趣，咁柏加要留喺馬刺，未來幾場波真係要搏命啦。
愛華頓同遼寧就李鐵嘅轉會費，爭持不下；有傳去年促成「雙李」過「拖肥糖」嘅國內電訊贊助商，會填咗筆差價，再促成好事。我求大俠最近見到呢間電訊公司新手機廣告，用着愛華頓波衫嘅李鐵擔正，如果李鐵踢唔番「拖肥糖」，廣告就冇晒意思，睇嚟會有轉機。
噚日我求大俠咪提到英格蘭對塞黑場波，英軍隊長臂章先後傳過畀四個球員嘅；前國家隊隊長白賴仁笠臣就鬧領隊艾歷臣，搞到做隊長好唔矜貴。艾歷臣都知衰，公開承認處理失當。又係嘅，球員好辛苦至搏到個隊長位，地位崇高，個臂章唔應該阿水都做得喎。
繼羅致阿仙奴門將施文後，曼城又要埋拜仁棄將三十三歲嘅泰勒，領隊基瑾似乎對啲老鬼特別有興趣，重猛話會繼續踢進攻足球，我求大俠就𢱑晒頭，咁多老兵點攻呢？而且曼城後防唔多掂，重係咁攻，好唔化算啫，唔通佢睇唔到上屆重用老將嘅熱刺點收場咩？
為咗表揚NBA總決賽首次由兩支ABA球隊爭奪，噚日嘅揭幕戰特別請咗兩隊嘅昔日名將「J博士」艾榮及卓雲跳球，跳球嗰波重用番ABA嘅三色籃球，但比賽嗰陣就用NBA傳統嘅橙色波。
其實首戰用三色波抑或用橙波都有唔同嘅意見，但畢竟總決賽意義重大，唔係玩玩吓，當然要跟隨傳統啦。
西班牙國腳古迪因備戰周六對希臘時扭傷足踝，對希臘同下個禮拜三戰北愛都踢唔到；佢效力嘅皇馬重頭痕，皇馬同皇蘇喺西甲最後衝刺，𠵱家冇咗古迪不特止，重有六名球員要代表西班牙出賽，皇馬真係保你大，千祈唔好再有球員受傷。