打機樂園：
率先試玩PS2消暑鐵三角《頭文字D》水杯練飄移

炎炎夏日，有乜好得過歎住冷氣，攤喺屋企度勁打心愛嘅Game。雖然必賣大作《WinningEleven7》要到八月先有得玩，一堆期待已久嘅中文化Game如《櫻大戰》、《TOD2》等，亦要七月先見街，不過六月尾正式踏入出Game旺季，香港傳媒更可率先試玩打頭陣嘅三大作品，今日就為大家作一試玩報告。

記者：徐影龍
逢星期一至五刊出

勁Hit賽車Game《頭文字DSpecialStage》及《GUNDAMSEED》等快將殺到，而據SCEH負責人Akio所講，呢兩隻Game均會大搞活動，比賽、試玩、明星、靚女等已屬指定動作，屆時重有大堆中文化Game試玩同Cosplay比賽㖭。

跟足漫畫有得玩水杯訓練
喺街機度Hit足成年嘅新一代賽車Game王《頭文字D》，6月26日正式推出PS2版《頭文字DSpecialStage》，好多機迷都期待呢隻Game喺家用機嘅內容同表現，可能接近發售日關係，試玩版完成度均十分高。欣賞完精采Opening動畫後，遊玩模式暫時只可選「公道最速傳說」一項，內容跟足漫畫版有齊31話故事內容，連用水杯訓練甩尾飄移都有，Fans肯定夠晒投入。揀選車種方面除拓海之AE86外，暫時只有池谷嘅S13、啟介嘅RX-7及中里毅嘅Skyline四款。跑道方面只可選妙義，秋名、赤城等地方睇到不過揀唔到。

充滿下坡道飄移快感
試玩版提供四位挑選對手，包括藤原拓海、武內樹、慎吾及中里毅等。最過癮係以拓海挑戰番拓海，明、暗燈兩款AE86黑夜中對決，鬥食坑渠邊入彎，夠晒刺激。正式進入鬥車模式，遊戲以三循環跑道決勝負，下坡道居然可循環三次，邏輯上好有問題。畫面方面雖不及《GT3》，不過流暢度及速度感相當不俗，尤其係響胎聲令甩尾快感爆燈，較奇怪係唯一嘅四驅車Skyline，居然可如AE86般輕鬆由頭飄移到尾，大大減低真實感。最為不滿係過長嘅Load碟時間，進入Menu要十秒，落場鍊車更接近二十秒，希望到正式版出街時有所改善。

新一代高達大耍昇龍劍
另一款暑假力推嘅勁Game，就係喺日本紅到發紫嘅《GUNDAMSEED》。今次玩法唔係出到悶嘅SLG類，而係酷似《FianlFight》嘅橫向動作打鬥，以全3D形式登場。主角機可如動畫般隨時轉換三種唔同武器配備，除攻擊面前敵人外，亦要留意深入畫面嘅遠方敵人。試玩後覺得畫面一般，多邊形唔夠紮實，幸好動作靈活精采，尤其係如昇龍劍之必殺技，為遊戲加入不少格鬥Feel。

鹹濕蚊今集針鬼妹
前年SCE充滿創意嘅《蚊》大收旺場，主要因為玩家扮演一隻蚊，以吸血為任務，穿梭屋內肆意攻擊人類，連靚女沖緊涼都照針，變態得嚟玩法亦好過癮。今集移師至夏威夷，除舊有日本家庭外，重新加入鬼妹一家俾你針，而且亦可選擇日本及美國兩種蚊作攻擊，相信在於速度及HP上嘅分別。玩法一如以往，不過就加入穴位按摩，每當被人類發狂追殺時，專攻指定穴位便可令其鬆弛，逃過被殺命運，過關技巧比舊作有更高要求。