工業股炒風尚未見有收斂迹象，經紀黃果然厲害，噚日推介崇高國際（209），話有鳳凰盤買入，果然大升8.19%，收0.66元。小初炒短線當然即刻沽出食胡，但經紀黃話可以睇多一陣。
小初賺咗錢，當然想乘勝追擊，於是再問經紀黃，重有邊隻工業股可以留意？佢話小初既然愛冒險，不如諗吓升岡國際（485），隻股炒復甦概念，不過未必即刻有胡食，可能要等一等，煲多一陣先至有得食。
升岡呢隻老牌電子股，雖然上市多年，但公司真正廣為人識，主要係老闆以前養嘅馬王靚蝦王。
其實升岡自去年12月公布中期業績，成功由虧轉盈賺到3千幾萬銀後，股價已經開始異動，似乎係有人立心造上。
升岡單單係今個月，股價已經由唔夠0.10元，升到家陣嘅0.15元。經紀黃話，由於升岡大約在7月公布全年業績，相信在此之前，股價會有一番熱鬧。
慕容小初