證券分析師W鍾意下午收市後到RitzCarlton（麗嘉酒店）飲下午茶。麗嘉嘅餐廳幾乎全部位於地底唔見陽光，畀人一種侷促感覺，唔係左丁山嘅優先選擇，但W小姐話麗嘉地面咖啡室用咗二千萬元裝修，行入去好方便，生意非常好，經常見到高官在此。
呢日分析師W做完嘢，五點幾先至去到，只見隔籬枱有一班政府官員在座（W小姐認得兩三位），高談闊論，言笑不禁，題目不離開官場動態，政壇是非，越講越大聲，唔知係有意發洩吖還是懶得理會旁人，W小姐見佢哋太嘈，特登移開去另外一邊。問W小姐：「官員究竟講啲乜？」W話：「唉，三句唔埋就鬧老董冇用，笑啲局長卸膊，睇怕特首不特民望低，喺公僕心中，亦全無威信，畀佢哋當係笑話。」
事有湊巧，聽完W講麗嘉故事之後，左丁山碰到一位科學家（唔止係教授咁簡單），科學家話最近同高官接觸多，聽講好多人認為沙士過後，疫症絕跡，經濟復甦或有起色之時，就會有人以健康問題，向中央請辭，左丁山話：「咁即係要等好耐啫！」科學家話：「○五年怕得喇啩！」左丁山大笑：「此乃價格敏感消息，事先知道嘅話，可以揸定期指，賺一千點起碼，你聽到乜，最緊要話我知！」科學家話：「會唔會畀人拉㗎，借內幕消息炒股喎？」你同我定，炒任何股票就會被調查，但知道內幕消息炒期指就唔犯例，唔使驚㗎。