華懋喺97年樓市高峯期，用55.5億元投得嘅淺水灣道129號地皮，經過四年半興建，昨日終於首度開放，定名為129淺水灣，發展商重特別準備本書仔，介紹物業嘅發展進程。
第一頁有三張相，一張係華懋集團董事梁榮江，當年投得呢幅地皮情景，咁歷史性嘅舉手，又見證樓市最興旺嘅時期，實在值得緬懷。旁邊兩張係淺水灣道129號喺50年代及70年代嘅面貌，𠵱家搖身一變，成為高聳大樓。
物業外形獨特，重係由殿堂級建築師NormanFoster設計，小冊子內，重有佢嘅設計草圖，介紹設計概念，草稿上面寫上It'salily，這是百合花（但蘭西點睇都覺得佢似馬蹄蘭），造形咁特別，難怪華懋一直都話129淺水灣將會係嗰區嘅新地標。
發展商重特別幫該盤員工設計專用嘅制服，款式都相當高檔。
市面回復生氣後，各大商場紛設優惠招徠。𠵱家只要一日內喺又一城商場兩間或以上商戶，消費滿千五蚊，就可以參加「即抽即獎」，獎品包括美容護膚禮品、美食現金券、時尚服飾用品等。另外重可以再參加「全城大抽獎」，特別大獎係八萬蚊又一城購物禮券，中到就真係買嘢買到手軟都得嘞。
另外，九龍倉嘅鑽石山荷里活廣場，喺父親節期間，大部份商戶都送出優惠，好似晚飯消費滿兩百蚊，就有相架（圖二）或禮品一份。
近排商場優惠多到數唔清，唔知地產版使唔使開番個商場購物優惠專欄，等消費者格吓價，去邊間買嘢着數啲。
發展商同代理老闆為激勵下屬，多做生意，同埋刺激吓啲行家嘅鬥心，周不時搞銷售數字或者銷售金額最高等乜乜大獎，頒獎例牌係舉吓紙牌咁，悶到嘔。
利記上個月做擎天半島，成績幾好，促成嘅單位同車位，佔總成交超過四成，九倉就頒個「勢如破竹」獎畀佢哋，為配合獎項名目同搞吓氣氛，利記將橫額設計成一碌竹，再做個紙斧頭畀黃光耀（圖三左三），扮嘢劈開碌竹，過程都幾得意。
昨天再見零感染，5月樓市氣氛明顯好轉，地產代理埋單計數，5月成績當然好過4月啦，美聯物業集團主席黃建業話，公司營業額大升近六成，重有五間分行佣金收入過一百萬㖭。
黃建業講，成績最好嘅係大埔嘉豐花園，營業額達173萬，主管周志忠順理成章做埋百萬分行主管㖭。其他四間就係又一村達之路、香港舖位部、駿景園同卓爾居分行。黃建業噚日特別頒錦旗畀各得獎主管，以示鼓勵。
元朗大型住宅項目YOHOTown又有新宣傳，今次搵嚟時裝設計師何志恩為該盤嘅會所員工，營業代表，同物業管理主任，設計服飾，噚日搞catwalk。
新鴻基地產代理總經理周國賢話，YOHOTown喺新元朗中心嘅示範單位，佔地約兩萬呎，重實牙實齒話7月一定可以開放，設立展覽中心以嚟，共錄得近五千個登記。
周國賢話，全新住宅項目未出台前，集團暫會促銷貨尾盤，將軍澳中心短期內會開放現樓示範單位，自提供「搬得易」優惠至今，共賣出二百伙，每呎二千七百蚊。集團另一個新盤鴨脷洲深灣軒，佢話政府稍後有公布。
蘭西
電郵地址：
