港股升破250日平均線後呈單日轉向，噚日恒指早市上升逾百點，下午在歐資沽盤湧現下倒跌23點，收報9639，成交107.63億元，好彩恒指仍能守在250日平均線之上。大市回吐，除咗大東批售電盈（008）抽水30億銀之外，大家亦驚美股腳軟，特別見到德昌電機（179）業績遠遜預期，大市沽壓立即加大，德昌本身都跌逾6%。
花旗美邦在發畀基金的配售電郵內講明，配售目的係大東要盡沽電盈，可見大東與電盈關係惡劣，呢一次真係要同電盈劃清界線。今次大東配售電盈，每股作價4.78元，折讓幅度達9%，雖然傳出話基金認購反應不俗，不過復牌後可能仍有受壓。
另方面，據聞今次有唔少大基金有份接貨，主要係大東唔再係電盈主要股東，電盈公眾持股量將增加，其在大摩指數市值比重將會相應增加，基金亦要相應調整投資組合比重。黑客話，今次焦點應該係小小超會否趁機增持，以及電盈會否進行大型回購。較早前，市場一直憧憬電盈可能向大東回購電盈股份，以消除股價壓力，但電盈高層一直否認。
媒體世紀（8160）宣布1供2，集資1.2億元減債，股價竟彈升12%，收報0.084元。Cookie話，今次供股差不多等於公司獲大股東注資減債，對公司當然係利好消息。今次供股價是每股0.10元，較周二收市價0.075元，有33.33%溢價，想叫小股東供股都幾難，大股東除承諾按比例供股外，亦會擔任包銷商，擺明有意借供股增持公司股權。大股東今次拿真金白銀出來改善公司業務，唔多唔少都會增加投資者信心。
阿虎