又一個非典型肺炎下的典型遭遇。噚日東亞主席李國寶出席旗下分行開幕儀式後對八方講，先幾日佢到日本拜訪當地賓架，雖然本港抗炎成效都好顯著，但仍有不少日本人聽到香港人就怕怕。雖然寶哥哥冇中招，但有兩個賓架點都唔肯同佢當面傾，一定要透過電話講嘢，你話幾無聊，不過好在都有八個人肯同佢見面傾偈，唔係就真係白飛一趟。
講到興起，寶哥哥又爆肚，大講對日本經濟嘅睇法。寶哥哥話，今次東瀛之遊除咗刺探當地軍情外，重認識唔少當地政經學者，經過綜合各家意見後，寶哥哥認為日本經濟將會喺好短時間內重新起飛，重會好急㖭，不過銀行壞帳就要再搞多兩年。寶哥哥重叫八方買日股，話起碼升兩成，但佢跟手話自己就未買，所以信唔信佢，就要你哋自己諗啦！
傳真︰2623-9278
電郵︰