國際知名嘅美國重金屬搖滾樂隊Metallica，近排不停力谷新碟《St.Anger》，而早前喺音樂節目《MTVicon》入面，有唔少年輕音樂人都唱歌向佢哋致敬，呢個節目會喺後日（星期日）喺有線電視播出，證明樂隊二十幾年嚟都好有地位同影響力。
不過Metallica近幾年都發生咗好多事，好似低音結他手JasonNewsted離隊，而主音JamesHetfield就曾經酗酒，不過鼓手LarsUlrich話：「加入新嘅低音結他手RobertTrujilla後，令我哋好似入滿油嘅機器咁！」
而主音JamesHetfield亦話，新碟嘅歌曲除咗夠勁之外，亦流露咗佢哋呢幾年嘅內心掙扎，所以重特別搵咗啲插畫家，畫咗啲好似徒手揸心臟同骷髏人俾繩索住嘅恐怖圖畫，反映佢哋嘅憤怒同痛苦。
為咗力谷新碟，Metallica唔止賣大包送全新嘅StudioLiveDVD，早兩日佢哋亦突然宣布提早五日，即係今日推出新碟，因為佢哋想fans快啲擁有隻碟，唔好喺網上下載啲濫錄嘅新歌喎。