今個星期最Hit當然就係SEGA嘅《育成足球3》，早於星期日已經有水貨商人從日本嚟到早貨，所以頭幾日都炒到$460-$470，不過隨日本正式發售，𠵱家市價已經回落到$400左右，暑假冇波睇不妨買隻返去做領隊。原定本月19日推出嘅《R-typeFinal》宣布延期至7月發售，但有消息韓國版會如期於6月19日發售，是真是假相信要到19號先有分曉。本月17日美國將會推出人氣大作《盜墓者》，等咗咁耐，千祈唔好錯過。
望穿秋水，有中文嘅XBOX《EnterTheMatrix》，行貨版如無意外會喺今個星期發售，普通版$299，連Matrix手表的特別版售$349。KOEI光榮大作《真‧三國無雙3》，亦宣布9月於美國推出XBOX版本，希望到時亦會有行貨出售。
上星期GC推出嘅《POKMONBOX》，隨遊戲會附送一張特別版記憶卡，市價約售$130-$140左右，有GBA紅、藍寶石版遊戲嘅機迷要留意，至於GC主機將會由6月21日左右附送GBPlayer，雖然日本定價無變，不過𠵱家香港GC主機冧價，只係賣$1,020左右，遲啲連GBPlayer就會回復$1,200-$1,300，想點揀自己諗諗。
文：打機鐵人