毛公仔玩具股中，小初鍾意德林國際（1126）多過崇高國際（209），皆因前者規模較大，亦較多芬佬捧場，但有人唔同意小初咁諗法，反而認為Smallisbeautiful。
崇高股價年初開始異動，皆因有芬佬垂青，唔經唔覺買咗7%街貨，跟住上個月底，崇高又搞咗次先舊後新配股，但Size好細，只係配售4800萬股，集資額只得2736萬元。
經紀黃話，當時佢亦唔明白，點解咁細規模嘅批股都要勞煩一間歐資大行出手，收尾先知原來係近期股壇金手指惠理基金要貨，要咗1700萬股，加埋本來持有嘅3百幾萬股，家陣持股量多過5%。
崇高批完股後，股價表現唔算太突出，但就一直企穩0.57元批股價樓上。周二端午節前，崇高微升1.67%，收0.61元，成交唔大。不過經紀黃就覺得，既然有鳳凰盤買入，加上現價距離基金入股價唔係高太多，佢覺得可以投機短炒一轉。
慕容小初