以「牛屎妹」形容童年時的蒙嘉慧相當恰當，在元朗長大的她，並不喜歡一般小女孩的玩意，反而經常聯群結隊到山邊及溪澗玩耍。蒙嘉慧在學校屢犯校規，更愛在新年時玩炸牛屎，是個不折不扣的「牛屎妹」。
元朗對於蒙嘉慧（YoYo）來說，蘊藏着無限的回憶。由於父母都要出外工作，在家中排行最細的YoYo，與哥哥姊姊都是由婆婆照顧。三兄妹童年時經常結伴到山邊及溪澗玩耍，在元朗過着儉樸簡單的鄉村生活。
其中令YoYo印象最深刻的，就是新年燒炮仗，她說：「記得讀小學嗰時，我哋喺新年都會玩炮仗，嗰陣成班人諗住炸牛屎整蠱人，點知最後我走唔切，搞到成身牛屎返屋企，重俾阿媽『藤條燜豬肉』。」
讀書時的YoYo自言是個壞學生，更曾經成為學校記缺點的女王，YoYo說：「曾經有個阿sir同我講：『你個樣生得好眉好貌，點解咁曳？你已經破咗學校女生記缺點嘅紀錄！』」原來YoYo足足被學校記了七個缺點，認真犀利。
雖然YoYo十分頑皮，但仍有懂事的一面，她說：「記得我細個時有近視，媽咪帶我去配眼鏡，因為當時屋企環境唔好，所以我就揀咗全間舖最平嗰副，因為真係好醜樣，所以媽咪好質疑我嘅眼光，重問我係咪真係要呢副眼鏡，我諗都冇諗就話係！」
對於現時與家人的關係，YoYo表示希望家人可以開開心心，她說：「細個婆婆最錫我，所以𠵱家我會盡量畀最好嘅生活佢，至於我哋三兄妹，關係愈嚟愈好，大家都會互相體諒。」
採訪：王崇穎
