政務司司長曾蔭權自從做咗清潔大隊隊長之後，真係鬼咁認真去搞好全港衞生；八方聽聞，喺份中期報告出台之前，佢老哥曾多次微服出巡，去啲黑點睇吓有幾惡劣，九龍城區後巷嘅可怕情況，就令司長大開眼界。
唔知係咪有親身經驗，煲呔今次搞衞生絕不手軟。為咗激勵士氣，佢最近頻頻去各部門探訪，叫班手足要加把勁，話公共衞生攸關，性命攸關。除咗搞清潔衞生，佢另一項重要任務係搞宣傳，八方聽聞，已經有多位巨星答應幫特區政府拍宣傳片，至於人名，就遲吓先公布。
八方一直覺得提高個人及公共衞生嘅意識必須由教育做起，應向下一代着手，你睇吓日本，無論係橫街窄巷，大小店舖，都擦得乾乾淨淨，但要香港班老人家改變習慣比較難，真係唔知幾時先改得到。眼前要見成績，煲呔其實可偷「少年警訊」橋，搞少年清潔隊，一定掂。
傳真︰2623-9278
電郵︰